DILI, STLTIMORLESTE.com – Primeiru Ministru (PM), Kay Rala Xanana Gusmão hateten, tempu besik nia sei nomeia Atonia oan hodi substitui Rogerio Tiago Lobato atu asumi kargu nuudar Prezidente Autoridade Rejiaun Administrativa Espesiál Oékusi–Ambeno (RAEOA).
Kestaun nee Primeiru Ministru aprezenta ba jornalista sira hafoin remata enkontru seminal ho Prezidente Republika (PR), Jose Ramos Horta iha Palasiu Prezidensial Nicolau Lobato, Bairo Pite, Kinta (12/06/2025).
“Imi sira iha nee se mak partidu nia ema, hakarak nee ema neebe Atoni nia oan neebe servisu hatene,” hatete PM Xanana.
Xefe Governu la esplika klaru kona–ba banhira los mak Governu atu nomeia Atoni oan atu lidera RAEOA.
Maibe nia dehan, wainhira nomeia ona mak kada fulan neen (6) sei halo avaliasaun ba ninia servisu, wainhira identifika nia la iha kapasidade atu halo servisu mak sei troka nia.
“Sei fo uluk fulan neen ba nia atu halo servisu, se la hatene servisu mak sai, tanba ita hatudu daudaun ona iha munisipiu sira seluk, ema orijen husi munisipiu nee mak lidera nia munisipiu,” tenik nia.
Entretantu iha biban nee PM Xanana la fo sai naran husi Atoni oan neebe nia sei nomeia hodi troka Rogerio Tiago Lobato ba lidera fali RAEOA.
(alb)
