DILI, STLTIMORLESTE.com – Primeiru Ministru (PM), Kay Rala Xanana Gusmão lori povu Timor Leste (TL) nia naran hatoo solidariedade ba povu Filipina neebe enfrenta situasaun tufaun neebe hamate ema nain 100 resin foin lalais nee.
“Hau lori povu TL nia naran, atan-oan hau hakarak iha uma fukun ida nee atu aprezenta sentidu solidariedade povu Timor nian ba povu Filipina,” Primeiru Ministru Kay Rala Xanana Gusmão hatooo iha Plenaria Parlamentu Nasional, liu husi debate OJE 2026, Kinta (06/11/2025).
Xefe Governu hatutan, iha dezastre naturais ka teromutu boot iha nasaun Filipina neebe ema lubuk ida mate, sobu uma, iha posibilidade boot atu ita loron hirak nee mai hetan tsunami.
“Nunee mos Governu haree hela atu deside, ohin karik, mak depois de ekontru, ami bele halo reuniaun estraordinariu Konselhu Ministru, kompanhia enjenaria ida ho kompanhia servisu sanitaria nian husi F-FDTL, atu ba iha neeba hodi partisipa hodi apoia emerjénsia neebe nuudar membru foun ba ASEAN ninia,” haktuir nia.
Nia reforsa, hanesan membru, sai membru plena ba ASEAN iha fulan kotuk, TL iha responsabilidade hodi halo asaun solidariedade ba nasaun membru sira neebe hasoru dezastre oin-oin.
“Nee mak atu informa ba ita boot sira hotu katak, aprezenta tiha ona ba Prezidente Republika Filipina, ita nia solidariedade neebe nuudar membru foun ASEAN ninian atu fo sentidu liu ba ita nia espiritu ba pas no solidariedade entre komunidade, ami sei konsidera no sei haree iha reuniaun estraordinariu Konselhu Ministru hodi haree hanusa mak ami sei haruka kompanhia enjenaria ida ho kompanhia apoiu sanitaria hodi hatudu ba mundu katak sim, iha fatin balu neebe ita bele ajuda vitima dezastre naturais, Timor Leste tenke hamriik hamutuk hodi bele ajuda,” esplika nia.
Entretantu notisia neebe publika husi Liputan6.com haktuir katak, Tufaun Kalmaegi hamate ema liu 100, Filipina deklara Estatutu Emerjensia Nasional no halo ema liu 560,000 sai dezlokadu.
Jornalista: Alberto Menezes
Editor: Xisto Mendonça
