NITIBE, STLTIMORLESTE.com – Primeiru Ministru (PM), Kay Rala Xanana Gusmão iha dialogu loron terseiru iha Postu Nitibe tuan ho povu iha Postu Administrativu Nitibe, rekonhese dezenvolvimentu Oekusi-Ambeno durante tinan 10 akontese deit iha Postu Administrativu Pantemakassar, maibe iha area rurais laiha dezenvolvimentu.
“Ita haree durante tinan 10 nia laran dezenvolvimentu akontese deit iha sidade Pantemakassar, maibe iha area rurais husi Postu Administrativu Pasabe, Oesilo no Nitibe laiha dezenvolvimentu,” dehan nia.
Tanba ida nee, bainhira kaer ukun, haruka Rogerio Tiago de Fatima Lobato nuudar Prezidente Autoridade Rejiaun Administrativa Espesial Oekusi-Ambeno (PA-AREOA), hodi lori dezenvolvimentu ba too area rurais no daudaun nee akontese ona iha Postu 3 nee mak Oesilo, Pasabe no Nitibe foho, estrada komesa loke ona ba povu,” dehan PM Xanana liu husi ninia diskursu iha dialogu ba loron terseiru ho povu Nitibe kona-ba desentralizasaun administrasaun no poder lokal, Kinta (01/05/2025).
Nia haktuir tan katak, objetivu husi loke estrada nee atu fasilitas povu nia movimentu ba merkadu, eskola, sentru saude no estrada nee sei loke hodi liga husi munisipal ba Postu Administrativu, suku no area remotas sira.
Iha biban nee, Jestor Postu Administrativu Nitibe, Agustino Afulit liu husi ninia diskursu hatoo benvindu ba PM Xanana ho Prezidente Autoridade RAEOA no estrutura hotu neebe mak ohin mai iha Nitibe hodi halao dialogu ho povu suku 5.
“Hau lori povu suku 5 iha Postu Administrativu Nitibe hatoo benvindu ba PM Xanana ekipa Nasional hamutuk ho Prezidente Autoridade RAEOA ho estrutura neebe mak ohin hakat mai iha Postu Administrativu Nitibe hodi realiza dialogu ho komunidade Nitibe kona-ba politika governu atu aplika desentralizasaun administrasaun no poder lokal.
Dialogu ba dala 3 realiza iha Postu Administrativu Nitibe, PM Xanana ho ekipa too iha Postu Tuan Nitibe, simu diretamente husi povu Nitibe ho bidu, tara tais, lia dadoli husi katuas lia nain sira, tenke kultura Oekusi (Bsoot) akompanha PM tama ba fatin serimonia hodi hahu dialogu.
(jos)
