DILI, STLTIMORLESTE.com – Primeiru Ministru (PM), Kay Rala Xanana Gusmão dehan, dezempenhu administrasaun estraga tiha husi VIII Governu Konstitusional, tanba nee IX Governu Konstitusional tenke hadia uluk sistema administrasaun.
Primeiru Ministru (PM), Kay Rala Xanana Gusmão hatoo kestaun nee ba jornalista STL iha Sentru Konvensaun Dili (CCD), Tersa nee (06/05/2025) katak, kona-ba osan atu kurize susar teb-tebes.
“Dezempenhu administrasaun kona-ba osan nee ita atu kurize nee susar tebes-tebes, agora koalia barak, sim ami koalia barak. Tinan 2 nia laran servisu mak kurize deit nee susar tebes-tebes, 700 metrus estrada gasta kedan osan US$ 5.000,00, 5 kilometrus estrada nee osan milhoens US$ 21, Programa Nasional Dezenvolvimentu Suku (PNDS) gasta kedan osan milhoens US$ 68, relatoriu dehan katak milhoens US$ 38, halo ona, selu ona, konklui ona maibe ba iha neeba laiha buat ida, osan nee ba iha neebe, milhoens US$ 30 tuir los fila ba kofre estadu, dehan iha hela banku US$ 5.000,00 iha nee, US$ 10.000 iha neeba, la kontrolu, ida nee mak ita kurize uluk tiha lai, tanba nee mak daudaun nee korize hela,” dehan PM Kay Xanana Gusmão ba jornalista STL iha Sentru Konvensaun Dili (CCD), Tersa nee (06/05/2025).
Nia haktuir tan katak, sei la korize osan Timor bele hotu, sei hakilar dehan hasae salariu minimu nee, osan atu foti husi neebe.
“Neebe deskulpa, hau tenke hakilar tanba hau mak kontra liberdade imprensa,” hateten PM Xanana ho oin midar no se kotuk ba jornalista sira.
(jos)
