BALI, STLTIMORLESTE.com -.Primeiru Ministru (PM), Kay Rala Xanana Gusmão halao vizita hodi haree direta no fo korajen ba vítima inundasaun iha Provinsia Bali, Indonezia.
Primeiru Ministru halao vizita ba vitima sira nee iha ambitu viajen servisu ba Reinu Unidu, Segunda nee (15/09/2025).
Tuir nota komunikadu imprensa neebe STL asesu husi media Gabinete Primeiru Ministru sita katak, udan boot neebe akontese iha Bali, hahu husi Tersa kalan (9 Setembru 2025) too Kuarta dader (10 Setembru 2025) halo mota balun nakonu no sistema drenajen sira labele hasai bee, hodi rezultadu inundasaun makaas afeta ba sidade neen iha Bali.
Inundasaun nee estraga uma atus resin, merkadu tradisional sira no estrada prinsipal sira hodi halo edifísiu sira monu.
Ajensia Nasional Jestaun Dezastre (BNPB) fo sai katak, ema nain 18 mate no rezidente atus resin mak sai husi uma.
Entretantu Governu liu husi reuniaun Estraordinariu Konselhu Ministrus (KM) iha loron 12 Setembru 2025 iha Palasiu Governu Dili, Governu Timorense hatoo solidariedade ba povu no Governu Republika Indonezia no autoridade provinsia Bali nian, haree ba efeitu destruidor husi inundasaun neebe akontese iha ilha neeba.
Iha kontestu ida nee aprova ona projetu Rezolusaun Governu nian, neebe aprezenta husi Primeiru Ministru, Kay Rala Xanana Gusmão, neebe autoriza doasaun dolar amerikanu milhaun 2,5 ba provinsia Bali, ho intensaun atu apoia esforsu asistensia umanitaria no rekuperasaun populasaun sira neebe afetadu.
Jornalista: Alberto Menezes
Editor: Xisto Mendonça
