AMBENO, STLTIMORLESTE.com – Iha loron Domingu lokraik, Primeiru Ministru (PM) Kay Rala Xanana Gusmão akompanha husi Ministru Obras Publikas (MOP), Samuel Marçal, Prezidente Autoridade Rejiaun Administrativa Espesial Oecusse-Ambeno (PA-RAEOA), Koordenador Zona Ekonomika Espesial ba Dezenvolvimentu Oecusse-Ambeno (ZEEDOA), Hercolanu de Sousa nomos Diretor Rejional sira vizita komunidade Naktuka, Suku Beneufe, Postu Administrativu Pantemakassar, Oecusse.
PM Xanana Too komunidade naktuka iha tuku 4 lokraik, simu husi Xefe Suku Beneufe, Marcos Coel Meni Sila ho Jestor Postu Administrativu Nitibe, Agustinho Afulit ho komunidade Naktuka, simu PM Xanana ho hatais tais kultura Atoni Oecusse nian nomos tara tais.
Jestor Postu Administrativu Nitibe, Agustinho Afulit hatoo Benvindo ba PM Xanana ho Ministru sira, Visi Ministru sira, sekretariu Estadu nomos PA-RAEOA ho Diretor rejional sira husi Oecusse neebe ho laran kman vizita komunidade Naktuka neebe baliza direitamente ho maluk sira husi nasaun vizinhu Indonezia iha Oepoli.
“Hau hamutuk ho Autoridade lokal sira iha Nitibe ho povu tomak iha postu Administrativu Nitibe, hatoo benvindu ba PM Xanana ho membru governu nomos membru autoridade RAEOA no ekipa neebe maka ohin mai vizita ami ho komunidade iha Naktuka,” dehan Jestor Postu Administrativu Nitibe, Agustinho Afulit, Domingu (30/11/2025).
Iha biban nee Jestor Nitibe informa katak, iha fulan hirak liu ba, sira hatoo ona pedidu ba PA-RAEOA, atu fasilita dialogu ho maluk sira iha linha fronteira Oepoli, tanba nee tentative neebe maka iha ona katak iha loron 10 de Dezembru tinan 2025, sei halao dialogu ho maluk sira iha Oepoli, atu hametin kooperasasaun iha setor oi-oin iha fronteira.
“Ami nia planu nee fiksu ona, aban ou bain rua ami sei hasoru PA-RAEOA ho estrutura tomak atu fasilita ami nia planu dialogu fronteira entre maluk sira iha fronteira Oepoli, neebe ami husu ba PA-RAEOA ho estrutura atu konvida maluk sira husi Oepoli no fasilita ami nia dialogu iha fronteira,” dehan nia.
Iha biban nee, Primeiru Ministru (PM), Kay Rala Xanana Gusmao apresia tebes ho inisiativa Autoridade Oecusse neebe maka iha inisiativa diak atu halao dialogu ho maluk sira husi nasaun vizinhu Indonezia, liu-liu Oepoli.
“Hau apresia ho inisiativa autoridade Oecusse neebe iha inisiativa diak hodi fasilita dialogu fronteira atu hametin familiar entre maluk atoni oan sira neebe hela iha linha fronteira, atu kria paz no estabilidade. Hau sei hatoo karta ida ba Prezidente da Republika Indonezia, Prabowo Subianto kona ba inisiativa ida nee no husu ba sira nia militar Indonezia atu labele interompe dialogu fronteira entre povu rai rua tanba ita tama ona ba membru asean, presiza kria paz no estabilidade ba moris diak povu iha area linha fronteira,” dehan nia.
Nunee mos Prezidente Autoridade Rejiaun Administrativa espesial Oecusse-Ambeno (PA-RAEOA), Regio da Cruz Salu dehan Governu Autoridade mos promove hela programa vizita ba malu.
“Ohin PM Vizita povu Naktuka ami bolu dehan makios tanba nee autoridade RAEOA kontinua promove programa makios ou vizita ba malu entre Oecusse oan ho Oecusse oan, nunee mos vizita ba malu entre maun alin sira iha fronteira Indonezia-TL hodi kontinua hametin paz no estabilidade, tanba povu neebe moris iha linha fronteira Oecusse, iha kultura no lian ida deit, tanba nee autoridade mos apoiu insiativa podu fronteira Naktuka suku Bene ufe nomos suku hotu iha Oecusse atu promove dialogu entre maun alin sira neebe hela iha linha fronteira,” dehan nia.
Iha sikun seluk, Administrador Distritu Nusa Tenggara Timur (TTU), Yosep Falentinus Delasalle Kebo iha serimonia aniversariu Proklamasaun Unilateral Timor Leste ba dala 50, dehan Oecusse-TTU Kefamenanu Indonezia hanesan odamatan boot ba dezenvolvimentu ekonomia iha linha fronteira rai rua, tanba nee povu neebe hela iha fronteira tenke moris diak hamutuk nuudar maun alin iha linha fronteira.
Jornalista: Joseph Koa
Editor: Joseph Koa
