DILI, STLTIMORLESTE.com – Parlamentu Nasional (PN) aprova ona orsamentu ba Ministeriu Obras Publika (MOP) ho montante US$ 207. 069.136 iha espesialidade ho votu afavor 43, kontra 15 no abstensaun 5.
Liu husi debate proposta OJE 2025, Sesta (15/11/2024) iha PN, iha debate nee iha proposta alterasaun 2, ho numeru 59 ho 65. Husi proposta alterasaun nee atu konsolida hasai tiha orsamentu balu husi MOP.
Relasiona ho proposta alterasaun ba redus osan nee, Ministru Obras Publika Samuel Marçal, pronunsia katak lá aseita, tanba proposta OJE nee aloka tuir programa.
Maske Governu la simu proposta alterasaun, maibe proponnte kontinua avansa ba votasaun, maibe iha votasaun proposta alterasaun 2 nee la pasa.
Prezidente Parlamentu Nasional (PPN), Maria Fernanda Lay submete ba votasaun ba orsamentu tomak MOP nian.
“Rezultadu votasaun afavor 43, kontra 15 no abstensaun 5, ho nunee orsamentu ba MOP pasa iha espesialidade”, anunsia PPN, Maria Frenanda Lay.
Tuir dadus neebe STL asesu iha Proposta OJE 2025, ba MOP US$ 207.069.136, neebe aloka ba Salariu Vensimentu U$ 9.182.148, Bens no Servisu US$ 19.032.404, Transferensia Publika US$ 176.500.000, Kapital Menor zero, Kapital Dezenvolvimentu US$ 66.042.798.
(gui)
