DILI, STLTIMORLESTE.com – Parlamentu Nasional aprova ona Orsamentu Jeral Estadu (OJE) 2025, neebe aloka ba Ministeriu Asuntu Kombatentes Libertasaun Nasional (MAKLN) ho montante U$ 207.069.136.
Liu husi debate proposta Orsamentu Jeral Estadu (OJE) 2025 iha Parlamentu Nasional, Sesta nee (15/11/2024), debate orsamentu ba MAKLN, laiha proposta alterasaun, nunee deputadu sira aprova ona osan ba MAKLN.
Maske la iha proposta alterasaun, tanba nee Ministru Asuntu Kombatentes Libertasaun Nasional, Gil Oan Soru hatete, iha debate ba orsamentu MAKLN, la iha proposta alterasaun, tanba nee la iha tan palavras ida atu koalia.
Enkuantu kona-ba harii, maibe Banku ba Veteranu “Ami halo hela esforsu, maibe nee laos Kompanhia Unipesoal, ohin koalia, ohin halo, maibe tanba Veteranu nee ami iha planu”, katak Oan Soru.
Tuir nia, karik hetan veteranu sira hatoo hela katak, planu MAKLN neebe sira halo hela esforsu, maibe presiza hotu -hotu atu tau hamutuk kbiit no orsamentu, nunee bele halao prosesu atu nee realiza.
Tanba nee husu mos ba Deputadu sira neebe mak Veteranu atu halao kontribuisaun tuir lei haruka, nunee transforma mehi sai realidade.
Enkuantu tuir dadus neebe STL asesu iha Proposta OJE 2025, osan ba MAKLN montante US$ 207.069.136, fahe ba kategoria Salariu Vensimentu US$ 1.787.636, Bens no Servisu US$ 5.949.982, Transferensia Publika US$ 195.515 922, ba Kapital Menor US$ 76.000, ba Kapital Dezenvolvimentu US$ 3.739.596.
(gui)
