DILI, STLTIMORLESTE.com – Parlamentu Nasional aprova ona Orsamentu ba Ministeriu Negosiu Estranjeiru (MNEK) ho montante milhaun US$ 32 resin iha espesialidade ho votu afavor 43, kontra 20 no abstensaun 1.
Liu husi debate proposta Orsamentu Jeral Estadu (OJE) 2025, Deputadu sira ho IX Governu Konstitusional halao diskusaun iha faze espesialidade ba loron datoluk iha PN, Kinta (14/11/2024).
Iha debate Deputadu sira hatama proposta alterasaun ida, maibe iha debate proposta alterasaun nee la pasa, nunee Deputadu sira aprova orsamentu ba MNEK, ho montante neebe orijinal, tanba laiha alterasaun.
Iha debate orsamentu nee Prezidente Parlamentu Nasional (PPN), Maria Fernanda Lay submete ba votasaun.
“Rezultadu votasaun ba orsamentu tomak MNEK, votu afavor 43, kontra 20 no abstensaun 1, nunee orsamentu ba MNEK pasa”, anunsia PPN, Maria Fernanda Lay.
Enkuantu tuir dadus neebe jornalista STL asesu, iha Proposta OJE 2025 montante orsamentu US$ 32.109.497 neebe fahe ba kategoria Salariu vensimentu US$ 16.926.324, Bens no Servisu US$ 14.383.173, Transferensia Publika US$ 0, Kapital Menor US$ 300.000, Kapital Dezenvolvimentu US$ 500.000. No orsamentu nee mos fahe ba programa Politika Externa de Timor -Leste ho montante US$ 26.255.431, no mos ba programa Funsionamentu no Dezenvolvimentu Institusional, montante US$ 5.854.066.
(gui)
