DILI, STLTIMORLESTE.com – Parlamentu Nasional (PN) aprova ona orsamentu ba Ministeriu Saude (MS) ho montante milhaun US$ 73.931.148 iha faze espesialidade ho votu afavor 42, kontra 0 no abstensaun 22.
“Ho nunee orsamentu ba Ministeriu Saude pasa,” hatete Prezidente Parlamentu Nasional (PPN), Maria Fernanda Lay iha ambitu debate OJE iha faze espesialidade, iha PN, Sesta (15/11/2024).
Entretantu iha diskusaun orsamentu ba Ministeriu Saude nee Bankada Partidu opozisaun aprezenta proposta ida neebe husu atu halo redusaun orsamentu hamutuk rihun US$ 40 resin husi misaun kombate Stunting, hodi aloka fali ba Ministeriu Saude espesifikamente ba programa kuidadu saude primaria, maibe proposta nee la pasa tanba bankada governu vota kontra proposta nee.
Entretantu tuir Orsamentu neebe aloka ba Ministeriu Saude (MS) ho montante US$73.931.148. Husi total nee, fahe ba kategoria Salariu no Vensimentu US$ 37.117.970, Bens no Servisu US$ 13.412.442, Transferensia Publika US$ 20.990.400, Kapital Menor US$ 1.000.000, Kapital Dezenvolvimentu US$ 1.410.336.
(alb)
