DILI, STLTIMORLESTE.com – Membru Parlementu Nasional (PN) husi Bankada CNRT, Deputadu Domingos Augusto Deker husu ba sidadaun estranjeiru sira neebe mak hela iha Timor Leste (TL) atu hakruuk ba lei neebe mak vigora iha TL.
Lia hirak nee hatoo husi Bankada CNRT, Deputadu Domingos Augusto Deker iha plenaria Parlamentu Nasional, Kuarta nee (16/07/2025).
“Tanba nee alerta ba sidadaun hotu, liu-liu sidadaun estranjeiru neebe mak hela iha TL atu hakruk ba lei neebe mak iha, la defende ba ita nia membru FFDTL ka PNTL ruma halao knaar sira, abuzu de poder uza sira nia kompetensia hodi halo naran naran halo agresaun fiziku ruma hasoru sidadaun nee, bele lori sira ba prosesu tuir lei neebe mak vigora iha ita nia rai, maibe iha tempu neebe mak sira halao hela sira nia knaar, husu ba sidadaun hotu-hotu atu respeitu ba entidade sira neebe mak halao pas no estabilidade iha rai laran,” dehan Deputadu.
Deputadu Domigos Augusto Deker hatete, hanesan reprezentante povu iha PN preokupa tebes ba situasun iha rai laran liu-liu komunidade sira neebe mak lakon respeitu hodi hasoru membru FFDTL no PNTL.
“Iha biban ida nee hau hakarak refere liu ba kazu ida iha semana kotuk akontese, komunidade Xineza ida neebe liman sorin lori kareta no liman sorin kaer telefone, membru polisia ida hapara atu fo xamada atensaun, maibe iha neeba nia halo kedas agresaun fiziku hasoru PNTL neebe mak halao hela nia knaar tuir lei,” dehan Deker.
Iha fatin hanesan, Deputada Cedelizia Faria dos Santos husi Bankada CNRT husu ba IX Governu Konstituisuonal liu-liu ba Ministeriu Interior no Ministeriu Defeza atu tau atensaun masimu ba hahalok sidadaun estranjeiru neebe mak tau liman ba lutu nasaun nian.
Deputada Cedelizia mos lamenta tebes kona-ba hahalok ema estranjeiru nia neebe mak hasoru lutu estadu nian, liu-liu ba Polisia Nasional Timor Leste (PNTL) sira neebe mak halao sira nia servisu iha terenu.
“Hau lamenta tebes ho hahalok ida nee, ita nia nasaun soberanu ona, maibe ema estranjeiru sira tau liman hodi hasoru ita nia luta nasaun nian, nasaun nee atu ba neebe, hau husu ba IX Governu Konstitusional liu-liu ba Ministeriu Interior no Ministeriu defeza atu tau atensaun masimu ba hahalok sira hanesan nee, hau sente triste no lamenta tebes,” dehan Cedelizia.
Entretantu hatan ba kestaun nee Visi Ministru Asuntu Parlamentar, Aderito Hugo da Costa dehan, prosesu ida nee husu atu investiga klean no fo mensajen ba sidadaun estranjeiru sira seluk katak bele mai hela iha rai nee maibe tenke kumpri regras rai nee nian.
“Kona-ba akontese sidadaun estranjeiru ida neebe halo agresaun fiziku ba iha Membru PNTL nee lamentavel tebes-tebes, atu hateten katak intervensaun ba iha aktus sira hanesan nee mos tenke seriu hodi prevene para labele akontese tan husi sidadaun sira seluk neebe mak mai ho fasil tebes asesu atividade, ate atividade komersial iha ita nia rai no mos la kumpri regras sira neebe mak autoridade sira aprezenta,” katak Aderito.
(EST 1)
