DILI, STLTIMORLESTE.com – Parlamentu Nasional (PN) liu husi Bankada Kongresu Nasional Rekonstrusaun Timorense (CNRT) husu Governu atu regulariza karreta ka kamioneta neebe tula sasan todan husi Indonezia tama mai territoriu Timor Leste, tanba estraga hotu ona estrada iha parte Maliana nian.
“VisI Ministru Asuntu Parlamentares, hau preokupa oituan ho kamioneta boot sira neebe mak ho plat BH husi Indonezia, neebe mak too agora sei tama nafatin iha ita nia rain, tanba foin lalais fim de semana nee ami halo atividade fiskalizasaun iha Munisipiu Bobonaro, ita akompanha karreta sira nee tama mai barak tebes-tebes,” hatete Deputada Bankada CNRT, Cedelizia Faria dos santos liu husi Plenaria, PN, Segunda (20/01/2025).
Nia hatutan, horbainhira Ministru Transporte no Komunikasaun (MTK) promete ona atu halo dekretu lei ida para atu regulariza karreta sira tama mai nee too neebe ona.
“Hau la hatene ninia prosesu nee too ona iha neebe, ita akompanha karreta sira nee tama mai ate iha Maliana neeba estrada sira iha neeba nee foin mak halo maibe aat hotu tia deit, ida nee halo ita triste tebes, hau espera katak dekretu neebe VIII Governu halo hodi hatama sesta bazika nee favor ida muda tia ba,” tenik nia.
Tanba nee, deputada nee husu Ministru Transporte atu aselera lalais lei hodi regulariza ka aplika tasa ba kamioneta neebe tama husi Indonezia mai Timor.
Hatan ba ida nee, Visi Ministru Asuntu Parlamentares, Aderito Hugo katak, Governu haree pontu situasaun ida nee eziste iha tinan barak nia laran, tanba wainhira governu hadia infraestrutura hanesan estrada too baze, maibe Governu mos rejistu preokupasaun lubuk ida oinsa atu aplika tasa ba karreta neebe tama husi indonezia mai Timor Leste.
(alb)
