DILI, STLTIMORLESTE.com – Reprezentante povu iha Uma Fukun Parlamentu Nasional (PN) husu Governu kontinua kontrola folin sasan iha merkadu, tanba sasan nesesidade baziku folin seidauk normal.
Deputadu husi Bankada FRETILIN, Oscar Lima hatete, ba tinan 2025 née orsamentu boot, tanba aloka bilhaun US$ 1.6, neebe presiza Governu atu halao dezenvolvimentu ba povu, liu-liu atu kontrola mos folin nesesidade bazika iha merkadu.
“Hau hein katak folin nesesidade bazika presiza kontrola hodi hatun folin, tanba povu hamlaha sai problema boot ba ita, hein katak Governu iha obrigasaun tomak atu buka solusaun”, katak Deputadu Oscar Lima ba STL iha PN, Dili, Tersa (07/01/2025).
Nia dehan, bainhira governu ida nee dehan katak sei halao esforsu tomak iha tinan 2025, ida nee sira mos sei bele reduz folin sasan neebe kontinua sai preokupasaun ba povu.
Hein katak Ministériu relevantes sei halao intervensaun, tanba agora povu kontinua hakilar ba folin sasan.
Maibe bainhira liu husi Kompanhia nee ladun iha benefisia, tanba nee diak liu Governu mak halao direta atu labele taes ba taes ikus povu nafatin sofre.
Entretantu Visi Ministru Asuntu Parlamentar (VIMAP), Adérito Hugo katak, kona-ba kestaun nee parte Governu sei esforsu oinsa atu haree, tanba nee mak tama ba 2025 Primeiru Ministru, Kay Rala Xanana Gusmão mos hatete ona katak, tenke esforsu aan atu halao servisu, tanba nee governu sei halao servisu, oinsa atu haree ba kestaun hirak nee.
(gui)
