DILI, STLTIMORLESTE.com – Parlamentu Nasional (PN) liu husi Bankada CNRT husu Ministru Obras Publikas (MOP) atu tau atensaun ba estrada Gleno ba Letefoho too Atsabe nomos Hatolia, tanba kondisaun estrada iha fatin neeba grave tebes.
Kestaun nee Deputada Bankada CNRT, Cedelizia Faria dos Santos levanta liu husi plenaria, Parlamentu Nasional, Tersa (28/01/2025).
“Hau hakarak levanta estrada Ermera neebe kada loron pior no grave liu tan, tanba tuir notisia neebe iha, estrada husi Gleno ba Letefoho too Atsabe nomos Hatolia grave liu ona,” hatete Deputada Cedelizia.
Nia hatutan, durante nee iha plenaria Deputadu Domingos Augusto Deker no Deputadu Marcos Martins levanta beibeik kona-ba estrada sira iha Ermera, maibe seidauk hetan resposta husi MOP. Tanba iha tinan 2024 Governu loke ona prosesu aprovizionamentu ba estrada Gleno ba Letefoho, maibe seidauk implementa too ohin loron.
Tuir notisia neebe iha, Govermu liu husi reuniaun Konselhu Ministru loke ona tender ba estrada refere. Maibe agora iha ona tinan 2025 eselensia Visi Ministru Asuntu Parlamentares, hau iha pergunta ida projetu konstrusaun estrada husi Gleno ba Letefoho nee bainhira mak hahu halo konstrusaun.
Hatan ba kestaun nee, Visi Ministru Asuntu Parlamentares, Aderito Hugo kompromete sei envia preokupasaun nee ba MOP atu bele tau iha atensaun.
“Hau sei envia ba MOP atu bele fo resposta kona-ba estrada refere,” hatan Aderito Hugo.
(alb)
