DILI, STLTIMORLESTE.com – Bankada Partidu FRETILIN iha Parlamentu Nasional (PN) husu Ministeriu Asuntu Kombatentes Libertasaun Nasional (MAKLN) atu tau atensaun ba kondisaun Saudozu Sebastião Gomes nia inan-aman iha Munisipiu Vikeke.
“Kondisaun husi Saudozu Sebastião Gomes nia pai no mae hasoru iha Munisipiu Vikeke neeba lamentavel tebes, tanba nee mak sujere ba governu liu-liu MAKLN atu kria mos kondisaun, nunee bele moris iha kondisaun ida neebe dignu,” hatete Deputada Bankada Partidu FRETILIN, Veronica Fernandes liu husi plenaria PN, Segunda (25/11/2024).
Nia hatutan, governu presiza kria kondisaun neebe dignu ba Saudozu Sebastião Gomes nia Pai ho Mae, tanba kada tinan povu Timor Leste selebra beibeik Masakre Santa Kruz 12 Novembru hodi hanoin hikas mos Saudozu Sebastião Gomes ninia mate iha momentu neeba.
Iha fatin hanesan, Bankada Partidu CNRT liu husi Deputadu Natalino dos Santos katak, iha tinan 2022 Komite 12 Novembru servisu hamutuk ho SASKAS halo ona uma ida ho kuartu rua, ho dapur ba Saudozu Sebastião Gomes nia pae ho mae iha Waimori, Munisipiu Vikeke.
Tuir nia, iha loron 12 Novembru 2023, governu liu husi Ministra Edukasaun (ME), Dulce Soares apoiu sasan uma laran inklui televizaun ba saudozu nia inan aman.
Tanba nee, nia husu Bankada Partidu FRETILIN atu labele ezije deit, maibe tenki buka hatene uluk dadus neebe iha molok ezije governu.
“Tanba ida nee hau husu para tenki iha dadus, se lae ita kondenan deit, no hau hanesan mate restu hakarak informa no husu ba governu atu tau atensaun ba saudozu nia inan aman nia saude,” hatan Deputadu nee.
(alb)
