DILI, STLTIMORLESTE.com – Parlamentu Nasional (PN) husu Visi Primeiru Ministru, Ministru Koordenador ba Asuntu Ekonomia (MKA) no Ministru Turizmu Ambiente (MTA), Francisco Kalbuadi Lay atu dezenvolve didiak setor turizmu iha tinan 2025, nunee bele kontribui reseita ba kofre estadu.
“Visi Primeiru Ministru no Ministeriu Turizmu atu esplika took tarjetu saida mak ita hakarak hetan iha area turizmu nia iha tinan 2025, tanba hanesan ohin Deputadu Antonio da Conceição hatete ona katak, setor turizmu nee hanesan area ida neebe estratejiku tebes atu ita hatama reseita ruma nunee bele ajuda ita, nunee ba oin bele hamenus ita nia dependensia ba orsamentu mina nian,” hatete Deputada Virgina Anabela wainhira halo audiensia ho Visi Primeiru Ministru, Ministru Koordenador ba Asuntu Ekonomia (MKA) no Ministru Turizmu Ambiente (MTA) ligadu ho OJE 2025 iha PN, Segunda nee (21/10/2024).
Tanba tuir Deputada nee katak, orsamentu neebe aloka iha tinan 2025 ba Ministeriu Turizmu nee, governu presiza hatene saida mak governu sei hetan husi setor turizmu nee, no numeru turista mak atu dada sira mai hodi fo rendimentu estadu ida nee.
“Pelumenus ho situasaun ida neebe agora ita enfrenta iha petroliu nian, iha tempu badak tenki iha ona substituisaun liu-liu atu reforsa ita nia reseita domestika, pelumenus nia bele sustenta kategoria ita nia orsamentu tomak, se labele sustenta kategoria tomak pelumenus salariu no vensimentu,” esplika nia.
(alb)
