DILI, STLTIMORLESTE.com – Reprezentante povu iha Uma Fukun Parlamentu Nasional (PN) liu husi bankada opozisaun husu Ministeriu Saude (MS) atu melhora servisu saude iha Timor Leste (TL) ho diak liu tan.
“Husu MS atu melhora servisu saude iha TL sai diak liu tan, tanba ita haree aimoruk laiha, ekipamentu laiha no profisional saude la tuir ninia area espesifiku sira, nunee numeru ema mate iha hospital kontinua aumenta, tanba nee mak husu Primeiru Ministru atu konsidera ida nee, tanba atu diak ba ita nia povu,” hatete Deputadu Bankada FRETILIN, Helena Martins iha ambitu debate OJE 2025 faze espesialidade iha PN, Sesta (15/11/2024).
Nia dehan, MS nafatin haree ba mal nutrisaun neebe mak sai nafatin problema ba populasaun sira, tanba tuir dadus mal nutrisaun iha 47%.
Iha fatin hanesan, Deputada Maria Nurima Alkateri husi Bankada FRETILIN dehan, nia preokupa ho numeru mal nutrisaun neebe mak aas iha TL, tanba nee presiza esforsu neebe mak transversal.
“Ita nia numeru mal nutrisaun kontinua aas nomos numeru mate no atendimentu la diak, nafatin sai problema ba saude iha TL. Depois transferensia pasiente ba rai liur Governu iha dividas ba hospital sira iha nasaun tolu hanesan Indonezia, Malazia no Singapura, nunee husu Governu tenke tau atensaun,” nia informa.
Hatan ba preokupasaun nee, Ministra Saude (MS) Élia A. A. dos Reis Amaral esklarese planu estratejiku nasional ba nutrisaun, Ministeriu halao servisu ba nutrisaun neebe espesifiku mak hanesan, promosaun edukasaun, sensibilizasaun no halo deteksaun ba problema desnutrisaun sira no tratamentu kliniku.
(jen)
