DILI, STLTIMORLESTE.com – Membru Parlamentu Nasional (PN) husu Komando Polisia Nasional Timor Leste (PNTL) Munisipiu Baukau, atu prosesa autor prinsipal sira neebe foin lalais nee asalta membru FALINTIL- Forsa Defeza Timor Leste (F-FDTL), Tenente Koronel Laurentino Gusmão ho familia iha Aubaka, Triloka, Munisipiu Baukau.
Tenente Koronel Laurentino Gusmão ho familia hetan asalta husi joven sira iha Aubaka, Triloka, Munisipiu Baukau, iha loron Kinta (31/10).
Bankada CNRT liu husi Deputadu Natalino dos Santos hatete, nia parte lamenta tebes ho atetude joven sira neebe ataka membru F-FDTL, Tenente Koronel Laurentino Gusmão ho familia, tanba nee Polisia atu halo investigasaun ba ema sira neebe la iha responsabilidade ba rai ida nee liu-liu sofrimentu Timoroan sira nian wainhira harii rai ida nee.
“Ema sira neebe tenta atu halo asalta iha dalan nee kriminoju, presiza halo atuasaun no fo sansaun todan ba sira no husu Komando PNTL Munisipiu Baukau atu investiga didiak, nunee bele hetan ema sira neebe envolve iha asaltu superior ida husi instituisaun F-FDTL,” hatete Deputadu Natalino dos Santos ba jornalista,sira iha resintu PN, Segunda (04/11/2024).
Nia hatutan, autoridade lokal sira tenki koordena ho Ofisial Polisia Suku atu halo sensibilizasaun ba joventude sira atu bele kompriende, nunee kazu sira hanesan nee iha tempu oin mai labele akontese tan.
(alb)
