DILI, STLTIMORLESTE.com – Parlamentu Nasional (PN) husu prosesa profesor balu neebe deskonfia tenta halo asediu seksual hasoru estudante ida iha Eskola Sekundaria 05 Maiu.
Prezidente Komisaun F neebe trata Asuntu Saude, Seguransa Sosial nomos Igualidade Jéneru iha Parlamentu Nasional (PN), Deputada Maria Bareto hatete, nia parte seidauk rona informasaun kona-ba ba profesores balu tenta halo asediu seksual hasoru estudante ida.
Maibe tuir nia, se informasaun nee mak los, nia husu atu prosesa profesor nee tuir tuir lei neebe mak iha.
“Prosesa no halo koordenasaun ho polisia VPU para bele prosesu kazu nee tuir dalan legal neebe iha no depois Ministeriu Edukasaun tenke foti sansaun administrativu ba iha profesor nee, atu nunee fo tempu ba profesores nee ba hatama iha tribunal,” hatete Deputada Maria Bareto ba jornalista sira iha PN, (27/02)2025).
Nia hatutan, tuir konvensaun direitu labarik nomos direitu labarik nia katak, wainhira labarik iha kualker situasaun neebe mak akontese, violasaun hasoru labarik iha situasaun ida neebe mak perigu, iha lei neebe mak bele prosesa autor nee ba iha justisa.
“Iha lei protesaun ba labarik sira no joven sira, signifika katak autor juridiku sira bele uza lei protesaun ba labarik joven em perigu hodi ajuda autor neebe mak halo asediu seksual hasoru labarik sira,” deputada akresenta.
Entretantu reprezentante povu nee mos husu ba Governu liu-liu Ministeriu Solidariedade Sosial no Inkluzaun ho ninia parseiru sira neebe jere uma mahon hanesan FOKUPERS, ALFELA nomos ba organizasaun seluk, atu bele kontinua fo asistensia ba iha alin feto nee para bele hetan konfiansa no seguru para bele sasin, no depois ba iha Ministeriu Edukasaun proteje estudante nee para kontinua asesu ba iha Edukasaun.
Entretantu iha loron Kuarta Feira (26/02) estudante Eskola Sekundaria Jeral 05 Maiu, ho idade 16, ho família ba keixa ona Diretor Eskola ho inisial CC ba Departamentu Investigasaun Kriminal Nasional (DIKN), tanba alegadamente halo asediu seksual.
(alb)
