DILI, STLTIMORLESTE.com – Membru Parlamentu Nasional (PN) liu husi Bankada FRETILIN husu Ministeriu Administrasaun Estatal (MAE) atu atualiza vitima sira neebe hetan eviksaun, oras nee hela iha neebe no hetan ona indemnizasaun husi governu ka seidauk.
Kestaun nee levanta husi Deputadu Bankada FRETILIN, Joaquim dos Santos wainhira halao audiensia ho Ministeriu Administrasaun Estatal (MAE) ho Prezidente Autoridade Munisipiu sira kona-ba prposta OJE 2025, iha Parlamentu Nasional, Tersa nee (22/10/2024).
“Hau nia pergunta mak nee, senhor Sekretariu Estadu Asuntu Toponomia no Organizasaun Urbana (SEATOU) no Autoridade Munisipiu Dili, liu-liu ba fatin rua hanesan Tasi-Tolu ho Bidau, hau atu dehan sidadaun sira neebe ita boot sira hasai ona nee, oras nee tau sira iha neebe no sira nia direitu neebe konstituisaun garante nee fo ona ga lae, tuir artigu 54 Konstituisaun Republika iha numeru 3,” levanta Deputadu Joaquim.
Tanba tuir Deputadu nee, governu atu halo eviksaun tenki prepara uluk kondisaun, no halo dialogu iha prosesu negosiasaun presiza kria kondisaun tuir dalan legal neebe iha, nunee evita abandona populasaun sira iha dalan ninia sira.
“Tenki konkordansia entre autoridade govenarmental ho sidadaun benefisiariu ou sidadaun sira neebe hetan eviksaun. Ita aseita Governu atu organiza Kapital Dili nee, maibe ita tenki kompri konstituisaun neebe iha,” realsa nia.
(alb)
