DILI, STLTIMORLESTE.com – Depuadu sira iha Parlamentu Nasional (PN) kestiona projetu estrada Wedauberek liga Alas Vila, Munisipiu Manufahi, muda ba Dotik, ida nee lamentável tebes.
Kestaun nee hatoo husi Deputadu husi Bankada FRETILIN, Antoninho Sarmento katak, liga ba estrada Wedauberek ba Alas, estrada nee agora abandona hela, depois la konsege halao advokasia diak para dezenvolvimentu lao ba povu.
“Maibe tuir informasaun katak, Ministériu Obras Publika (MOP) entrega fali asuntu nee ba Prezidente Autoridade Munisipiu (PAM) ho Autoridade sira atu rezolve. No PAM rasik hatete, halao ona reuniaun ho Konselhu Konsultivu lokal sira desidi katak estrada nee atu lori fali ba Dotik mak kontinua ba Alas Vila,” kestiona Deputadu FRETILIN, Antoninho Sarmento iha PN, Segunda (25/11/2024).
Reprezentante povu nee kestiona, muda estrada husi Wedauberek ba fali Dotik, Alas nee iha problema ka lae, tanba saida mak tenke muda, karik iha broker ruma iha laran mak impede sasan sira hanesan nee. Tanba nee husu atu governu esplikasaun klareza.
Hatan ba kestaun nee, Visi Ministru Asuntu Parlamentar (VIMAP), Adérito Hugo katak, kona-ba kestaun sira neebé Deputadu sira foti, nia parte alista, no sei envia ba Ministru Obras Publika atu bele resposta detalhadu.
(gui)
