DILI, STLTIMORLESTE.com – Membru Parlamentu Nasional (PN) iha uma fukun PN preokupa ho eletrisidade neebe kada loron mate beibeik no estraga komunidade sira nia sasan eletroniku iha Suku Komoro.
Kestaun nee Deputada Bankada Partidu Demokratiku (PD), Sancia Tilman liu husi plenaria iha PN, Segunda nee (17/03/2025)
“Eletrisidade kalan-kalan mate hela deit, liu-liu iha area Komoro no tuir informasaun neebe hau rona husi ema tekniku sira katak, ahi nia travo nee kiik liu hodi nunee eletrisidade iha parte Komoro too Tasi-Tolu kalan mate beibeik,” hatete Deputada Sancia Tilman.
Nia dehan, iha Domingu kalan nee ahi mate liu tiha 5 Minutu lakan fali, kuaze dala tolu hanesan nee, no estraga komunidade sira nia sasan eletroniku sira.
Tanba nee, reprezentante povu nee husu Ministeriu Obras Publikas atu buka solusaun ba problema nee.
“Hau husu ministeriu kompetente atu bele tau iha konsiderasaun, hodi nunee labele difikulta beibeik komunidade sira, tanba dala barak ona kuandu ahi mate hanesan nee estraga komunidade nia sasan eletroniku sira nee aat hotu kedas,” dehan nia.
(alb)
