DILI, STLTIMORLESTE.com – Deputada Bankada PLP, Maria Angelina Lopes Sarmento deklara, iha Suku Hataz, Aldeia Aidabasalala, Postu Administrativu Atabae nian, liu-liu iha Aldeia Aidabasalalan, populasaun sira hatoo informasaun katak fiu eletrisidade monu tun ba rai kuaze tinan rua ona, maibe EDTL too agora seidauk tau matan.
“Depois rona tiha informasaun ida ne’e hau rasik ba liu duni husi fatin neeba iha Aiteka laran nian, realidade hatudu duni katak fiu refere monu loos iha estrada klaran, no kuandu ema primeiru vez mak liu ho motor iha nee bele hamosu kazu dezastre ba motor sira, tanba fiu tabele tun hela, kuandu ema halai ho aselera fiu nee bele kait ba nia kakorok no bele lori dezastre ba ema,” katak Deputada Maria Angelina iha Parlamentu Nasional liu husi Plenaria, Tersa nee (08/04/2025).
Deputada Maria Angelina hatutan, ahi neebe mak fornese husi area Mandoki nian mak fiu ida monu daudaun nee, maibe too agora la lakan, tanba fiu ida ne’e monu kuaze tinan 2 resin ona.
“No alternativa ida mak sira fornese fali eletrisidade husi area Atabae nian mak sae ba atu ba hadia no wainhira ema oin foun mak liu husi area refere iha kalan nakukun nia la hatene katak fiu ne’e monu hela entaun fiu ne’e bele kait ba ema nee nia kakorok,” katak Deputada Maria Angelina.
Iha fatin hanesan, Deputadu Jose da Cruz, husi Bankada FRETELIN afirma, iha Suku Tebaboi komunidade sira aprezenta mos sira nia preokupasaun kona-ba linha eletrisidade.
“Iha hau nia kontaktu eleitoral ba iha Suku Tebaboi komunidade sira aprezenta sira nia situasaun iha neeba kona-ba linha eletrisidade neebe sira rasik halo esforsu dada ahi ba sira nia uma laiha ai-riin propiu, dala ruma sira tula fiu eletrisidade iha fali ai leten,” katak Deputadu Jose.
Entretantu parte husi Tekniku Visi Ministru Asuntu Parlamentu nian sei envia preokupasaun hirak nee ba ministeriu kompotente hodi rezolve iha tempu badak.
(EST 2)
