DILI, STLTIMORLESTE.com – Parlamentu Nasional (PN) preokupa ho kapasidade ezekusaun Orsamentu. Jeral Estadu (OJE) husi Visi Primeiru Ministru (VPM), Ministru Koordenador ba Asuntu Ekonomia (MKA) no Ministru Turizmu Ambiente (MTA) nian, tanba OJE 2024 nia ezekusaun sei kiik.
Bankada Partidu Libertasaun Popular (PLP) liu husi Deputada Maria Angelina Sarmento husu Visi Primeiru Ministru, Ministru Koordenador ba Asuntu Ekonomia no Ministru Turizmu Ambiente (MTA) atu fo esplikasaun kona-ba ezekusaun neebe sei kiik, maske too ona segundu trimestre.
“Hau hakarak husu ba senhor Visi Primeiru Ministru atu aprezenta mai ami kona-ba ita boot sira nia ezekusaun orsamentu ba tinan 2024, husi MKAE ho MTA nee too neebe ona, tanba informasaun neebe mak tama mai PN nee, ezekusaun iha segundu trimestre too fim fulan Julhu 2024, persentajen ezekusaun ida neebe ita bele dehan la inspira ministeriu ida nee atu ezekuta orsamentu ho montante neebe boot,” hatete Deputada Maria Angelina wainhira halo audiensia ho Visi Primeiru Ministru, Ministru Koordenador ba Asuntu Ekonomia no Ministru Turizmu Ambiente iha PN, Segunda nee (21/10/2024).
Tanba tuir Deputada nee, orsamentu ba MKAE iha segundu trimestre nee foin alkansa deit 24% no tuir dadus neebe instituisaun sira neebe tutela iha MKAE hanesan AIFAESA foin ezekuta deit 3%, Sentru Lojistiku Nasional (CNL) 19%, Insitutu Peskiza Dezenvolvimentu Formasaun Bambu 11%, Instituto Para Kualidade Timor Leste Institutu Publiku 16%.
Aleinde nee orsamentu ba Visi Primeiru Ministru hamutuk rihun US$ 400, maibe ninia ezekusaun sei 0%.
“Entaun ami nia pergunta orsamentu neebe propoin ba MKAE inklui Institutu Publiku sira neebe tutela ba MKAE nee ami garantia sei la inspira ita boot sira atu iha ezekusaun ida neebe diak too fin tinan 2024, mai iha tinan ida nee,” esplika nia.
Iha fatin hanesan, Deputadu Bankada Partidu Demokratiku (PD), Antonio da Conceição hatete, orsamentu neebe aloka ba Visi Primeiru Ministru hamutuk rihun US$ 400 husi orsamentu 2024 too oras nee seidauk ezekuta, tanba Visi Primeiru Ministru foka liu ba oinsa lori Timor Leste adera ba Organizasaun Mundial Komersiu (OMK).
“Hau hanoin katak Visi Primeiru Ministru ninian orsamentu neebe aloka ba Gabineti la ezekuta ho diak, tanba iha tinan 2024 nee, Visi Primeiru Ministru konsentra liu ba atividades anteriores nian liu-liu haree liu ba adezaun Timor Leste nian ba Organizasaun Mundial Komersiu, nunee fo duni impaktu ba ezekusaun orsamentu neebe aloka ba Gabinte Visi Primeiru Ministru nian,” hatete Kalohan.
Haree ba ezekusaun neebe mak ladun diak, Kalohan husu Visi Primeiru Ministru, MKAE no MTA atu fo esplikasaun ruma kona-ba dezafiu saida deit mak impede iha tinan 2024, Deputadu sira mos bele komprende tanba sa mak osan nee la ezekuta ho diak.
(alb)
