DILI, STLTIMORLESTE.com – Membru Parlamentu Nasional (PN) preokupa ho prosesu pagamentu ba pensaun, tanba veteranu no kombatente sira tenki forma linha neebe naruk hodi simu sira nia direitu.
Deputadu Bankada Kongresu Nasional Rekunstrusaun Timor (CNRT), Natalino dos Santos apresia governu husi primeiru governu mai too IX govern,u tanba bele hari MAKLN hodi bele haree prosesu atu fo valorizasaun ba kombatente libertasaun nasional sira.
Tuir nia, tinan barak Kombatente sira halo sira nia dever ,atu defende estadu ida nee tan nee estadu iha dever mos atu respeita sira nia direitu.
Maibe nia preokupa ho prosesu pagamentu neebe ih,a tanba obriga kombatente sira forma lina naruk iha MAKLN ,hodi simu sira nia direitu neebe rezistu iha segundu faze husi tinan 2009
“Maibe ita haree katak veteranu sira barak hanesan neeba, ida nee mos sei sai problema bot ida, karik bele MKALN halo jestaun para depois bele selu deit iha munisipi, hasai sirkular ida hodi selu liu husi kada munisipiu deit,” hatete nia ba jornalista sira, iha resintu Parlamentu Nasional, Segunda (15/12/2025).
Nia hatutan, tuir lo-loos MAKLN kria ekipa ida atu selu fazeadamente iha kada Munisipiu, ezemplu selu uluk iha munisipiu Dili hotu tia mak kontinua fila fali ba Munisipiu sira seluk nunee bele fo biban ba veteranu sira atu simu sira nia direitu.
“Tanba nee hanesan veteran ida husu MALKN no KKLN atu koordena ho KKLN munisipiu sira atu organiza didiak tempu tuir kalendariu neebe mak iha atu selu uluk munisipiu neebe, no kria kondisaun neebe diak ba sira nunee labele sakrifika fali ita nia inan aman sira neebe terus ba rai ida nee, agora mai foti sira nia direitu sira tenki hein loron tomak ida nee ita hare ladun diak,” rekomenda nia.
Reprezenta povu nee mos apresia ho Minstru Gil Oan Soru. tanba fo sai ona informasaun katak pagamentu nee sei halo too fulan Janeiru 2026.
Iha sorin seluk Deputadu Bankada FRETILIN, Jose da Cruz mos preokupa ho MAKLN neebe fo fiar ba Banku Nosso Futuru, neebe seidauk iha kapasidade jestaun atu halo pagamentu pensaun ba veteranu sira.
“Hau hanoin ida nee ita presiza hare ho seriu tanba kolia kona ba instituisaun estadu lolos atu serve publiku liu-liu ba entidade veteranu sira, maibe hau hatete katak Banku Nosso Futuru (BNF) hanesan banku neebe foun dala ruma sira seidauk iha preparasaun neebe mak diak, hodi atende ka selu pensaun veteranu sira nian,” dehan Deputadu Jose.
Nia dehan, funsionariu sira neebe servisu iha Banku Nosso Futuru iha esperiensia, maibe dala ruma sira sei buka hela forma ida neebe mak diak oinsa atu halo atendimentu ida neebe mak diak, tanba tuir lista benefisiariu neebe mak foin lalais aprezenta katak iha rihun 60.
Tanba nee nia sujere ba jestor BNF iha tempu oin mai bainhira governu fo fiar atu halo pagamentu ba pensaun veteran, sira presiza hare didiak fila forma nebe diak atu implementa.
“Hau hanoin ba futuru jestor ba Banku Nosso Futuru presiza haree didiak fila fali forma ida neebe mak diak, se sira rasik labele atende benefiasiariu sira iha tempu badak nee ho diak, entaun bele buka parseria balu hanesan BNCTL, Mandiri no BRI para oinsa bele distribui servisu sira neebe mak labele konsentra deit iha Banku nosso Futuru, tanba banku nee foun no foin hari iha tempu besik nee,” dehan nia.
Jornalista: Alberto Menezes
Editora: Carme Ximenes
