DILI, STLTIMORLESTE.com – Parlamentu Nasional (PN) liu husi Bankada CNRT preokupa ho kompanhia internasional husi Xina Norinco Internasional Cooperation Lda, neebe abandona ona konstrusaun estrada Laga Baguia iha Munisipiu Baukau.
“Sua excelensia Visi Ministru, kompanhia neebe kaer obra konstrusaun estrada Laga ba Baguia nee lentu demais, neebe favor ida hatoo hela ba Ministru Obras Publikas atu tau atensaun ba konstrusaun estrada nee,” hatete Deputadu Virgilio Perreira liu husi plenaria iha PN, Segunda (28/04/2025).
Nia hatutan, governu liu husi Ministru Obras Publikas presiza avalia kompanhia internasional, se nia laiha kapasidade atu kaer obra nee diak liu entreba ba kompanhia seluk atu bele aselera lalais estrada nee.
Tanba konstrusaun estrada oras nee paradu maske sei iha Laga no labele kontinua tan, no tuir informasaun neebe komunidade sira fo katak kompanhia refere la iha ekipamentu no hein fali ekipamentu husi kompanhia ida kaer estrada Kelikai nee remata mak foin utiliza ninia ekipamentu nee atu halo estrada Laga ba Baguia.
“Se karik kompanhia nee mak laiha kapasidade diak liu governu halo lalais pagamentu ba obra neebe sira halo ona, no loke fali tender ba kompanhia sira seluk atu nunee konstrusaun estrada nee bele lao nafatin,” dehan nia.
(alb)
