DILI, STLTIMORLESTE.com – Prezidente Parlamentu Nasional Interinu, Alexandrinho Afonso Nunes husu Deputadu sira iha Parlamentu Nasional (PN) atu tau konsiderasaun ba aspirasaun husi estudante no sosiedade sivil, neebe diskorda atu sosa tan kareta unidade 65 ba deputadu sira iha sesta lejislatura.
Alexandrino hatete, iha loron 1 Setembru nia foin simu kargu hanesan Prezidente Parlamentu Nasional Interinu no nia seidauk simu karta ruma husi estudante sira kona-ba prosesu sosa viatura ba deputadu sira.
Mezmu nunee, nia labele fo komentariu prosesu viatura ba deputadu sira tanba nia seidauk simu buat ida, no hein Prezidente Parlamentu Nasional fila husi viajen trabalhu mak bele adianta ba publiku.
Maibe husu ba deputadu sira atu tau konsiderasaun ba aspirasaun estudante universitariu no sosiedade sivil neebe husu Parlamentu Nasional atu hapara prosesu sosa kareta unidade 65 ba deputadu sira iha sesta lejislatura nee.
“Preokupasaun estudante sira iha direitu para atu haree, karik iha buat ruma lao los, ita bele haree no pasti iha solusaun, neebe ba ukun nain sira mos tenke iha laran luak oinsa bele rona aspirasaun povu nian hodi bele buka dalan,” hatete PPN Interinu, Alexandrino ba jornalista sira, hafoin plenaria PN, Kuarta (03/09/2025).
Timor Leste tuir nia adopta sistema demokrasia, sidadaun hotu-hotu iha direitu atu hatoo sira nia aspirasaun liu husi asaun pasifika sira hodi kontesta desizaun Parlamentu Nasional hola kareta ba Deputadu sira.
Maibe Parlamentu Nasional sosa duni kareta ba Deputadu sira iha sesta lejislatura nee mak kareta tuan sira neebe oras nee Deputadu sira uza sei entrega hotu patrimoniu estadu hodi distribui fila fali ba instituisaun sira neebe oras nee presiza hela kareta.
“Tuir buat neebe hau hatene katak kareta nee ba Parlamentu Nasional, no lejislasaun ida nee atu uza no wainhira mandatu hotu kareta nee nafatin iha tau iha Parlamentu Nasional nee, nunee Deputadu sira foun mai nee kontinua uza, neebe laos ba pesoal katak hola hotu tenke lori lae, karik ida nee mak akontese mos ami dala ruma la aseita ho ida nee,” dehan nia.
Joralista: Alberto Menezes
Editora: Carme Ximenes
