DILI, STLTIMORLESTE.com – Organizasaun Noun Governamentu Lao Hamutuk (LH) sujere ba segundu orgaun Parlamentu Nasional (PN) tenki diakuti Orsamentu Jeral Estadu (OJE) 2025 ho prudente no kuidadu bazeia ba evidensia neebe kondisionavel.
“Lori ona submisaun neebe deskreve ho LH nia analiza, perspetiva no rekomendasaun konstrutivu sira kona-ba proposta OJE 2025 nian ba iha PN atu ajuda Deputadu sira nuudar baze referensia ba diskuti ho klean, prudente no detalhu liu iha plenaria antes foti desizaun ba aprovasaun,” dehan Peskijadora Lao Hamutuk (LH), Elizaria Febe Gomes ba jornalista sira liu husi Konferensia Imprensa, iha Vila Verde, Dili, Tersa (29/01/2024).
Tanba tuir nia katak, Governu iha hakerek no diskursu sira rekonhese diak tebes kona-ba urjensia atu halo investimentu, alternativu hafoin mina hodi prevene Timor Leste monu ba rai naruk fiskal, infelizmente la hatudu iha senariu proposta OJE 2025, Governu propoin montante biliaun US$ 2.2 ka sae 12% kompara ho tinan 2024 no kontinua aumenta tan iha despeza sira iha futuru.
Maibe alokasaun iha OJE 2025 ba Projetu Tasi Mane konstrusaun no reabilitasaun auto-estrada, baze fornesimentu iha Suai kuaze tokon US$ 40 no kontinua sae makaas iha projesaun sira ba tinan tuir mai.
Iha 2026 tokon US$ 145 no tokon US$ 223 iha 2027, inklui mos alokasaun ba reabilitasaun Aeroportu Suai ho tokon US$ 1.6 inklui aeroportu Dili neebe finansiamentu sei aumenta iha projesaun sira.
“Ita nia Governu gasta ona enerjia no osan barak ba mega projetu, maibe uzu sira la hatudu ba longu prazu, projetu boot hirak nee too ohin loron, la konsege lori benefisiu ba povu ka ajuda hakbiit ekonomia povu Timor Leste nian, tanba sa Governu nafatin fo prioridade,” dehan nia.
Tanba tuir nia, Governu gastu ba eletrisidade, haree katak eletrisidade mos nuudar elementu importante ba povu, maibe iha ona urjensia atu hanoin, oinsa setor ida nee labele kontinua depende ba OJE, kada tinan liu husi Ministeriu Obras Publika (MOP) hodi fo subsidiu ba EDTL, selu EDTL nia tusan, selu ba kombustivel fosil, inklui aloka liu husi Fundu Infraestrutura ba eletrisidade no RAEOA nian.
Entretantu Peskizador LH ba Asuntu Agrikultura no Ekonomia, Mariano Ferreira afirma, Timor Leste presiza halo redusaun iha gastu administrativu no fo prioridade ba setor sosial no setor produtivu sira, tanba realidade iha despeza OJE 2025 nian, maioria ba kustu administrasaun, subsidiu ba veteranu sira newbw kontinua sae husi US$ 113 iha 2024 ba US$ 207 iha 2025, pensaun ex-titular sira.
“Ami mos preokupa ho finansiamentu ba instituisaun no empreza publiku sira hanesan Timor GAP kontinua hetan alokasaun tokon US$ 16, realidade nia balansu iha 2023 sei hela tokon US$106, laiha valor atu kontinua aloka osan tan ba instituisaun neebe la fo reseita ba estadu no kontinua promove planu neebe la realistiku ba povu no nasaun TL,” dehan nia.
(EST 1)
