BAUKAU, STLTIMORLESTE.com – Implementasaun projetu husi Programa Nasional Dezenvolvimentu Suku (PNDS) tinan nee, Autoridade Suku Soba iha Postu Administrativu Laga, Munisipiu Baukau, fo prioridade estrada ba Aldeia Fatiliri.
Xefe Suku Soba, Francisca Monica de Fatima esplika, planu prioridade tuir menu indikativu neebe hatuur ona iha mata dalan PNDS nian, Autoridade Suku Soba tinan nee hili infraestrutura bazika atu loke estrada foun diresaun husi Suku ba Aldeia Fatiliri no reabilita estrada balu iha Aldeia refere.
“Estrada nee nia kilometru 9, maibe nia orsamentu seidauk fo sai, tanba orsamentu postal husi Munisipiu ba Postu no Suku seidauk,” hateten Xefe Suku Soba, Francisca Monica de Fatima ba STL iha Vila Nova Baukau, Segunda (16/02/2026).
Tempu implementasaun projetu refere parte Autoridade Suku Soba seidauk hatene klaru, tanba orsamentu ba projetu refere Autoridade Munisipiu Baukau seidauk fo sai montante ba Autoridade Postu no Suku, maibe bainhira Autoridade Munisipal aloka ona orsamentu projetu refere sei lao no ternima tuir data projetu PNDS nian.
Nia fundamenta, razaun Autoridade Suku fo prioridade atu loke estrada husi Suku ba Aldeia Fatiliri, tanba durante nee komunidade sira la aseau estrada nunee difikulta tebes komunidade sira labele transporta produtu lokal ba merkadu.
“Bainhira estrada nee lao no finaliza bele fasilita ona ita nia komunidade sira bele lori sira nia produtu ba merkadoria, tanba durante nee estrada la diak,” Francisca akresenta.
Entretantu estrada kilometru 9 refere, Autoridade Suku liu husi ekipa halo ona preprasaun no tuir planu bainhira loke iha parte suvida sira sei halo reabilitasaun balu, nunee fasilita komunidade sira halo movimentasaun ho transporte.
(tom)
