DILI, STLTIMORLESTE.com – Orsamentu Polisia Nasional Timor Leste (PNTL) tinan 2026 aloka cerca milhaun US$ 43 ba saláriu no vensimentu polísia sira, no milhaun US$ 5 ba beins de servisus no kapitál menor, hanesan manutensaun viaturas, kombustível no nesesidade ofísiu atu suporta servisu operasional no garante ordem publiku no estabilidade iha Timor Leste.
“Iha milhaun US$ 43 mak kobre ba iha saláriu no vensimentu ne’e tanba ita haree iha númeru polísia neebe boot, barak nunee mos ita nia adidu sira neebe koloka iha nasaun haat hanesan iha Indonézia, portugal, Australia no Malazia, depois ita haree ba meius neebe atu halo servisu ba iha servisu operasionais sira iha terrenu presiza viaturas, presiza manutensaun, presiza kombustível atu nune’e bele garantia meius sira nee bele iha kondisaun neebe diak para bele garante ordem públiku iha Timor Leste,” hatete Komandante Komando Administrasaun PNTL, Superintendente Xefe Polísia José Soares ba jornalista sira iha Komando Jerál PNTL, Kaikoli, Dili, Sesta (13/03/26)
Nia dehan, nunee garante estabilidade iha ita nia nasaun ida nee hodi kontribui ba Timor-Leste neebe faz parte ona iha ASEAN, nunee mos kontribui ba iha paz ba mundiál, maske iha geopolítika iha tensaun, iha kontestamentu entre estadu poderes sira, maibe ita hanesan nasaun kiik ita tenke hatudu aan neebe nakonu ho hakmatek iha paz nia laran.
Antes nee Komandante Jerál Polísia Nasional Timor Leste (PNTL), Komisariu Jerál Polísia Henrique da Costa halo abertura Departamentu Administrasaun Finansas entrega kedas livru orsamentu ba iha Komandante Munisípiu no Unidade sira.
“Depois de komandante jerál halo abertura, intervensaun, iha ikus mai husi parte administrasaun, finansas no departamentu sira ita entrega livru orsamentu ba iha komandante munisípiu sira, unidade sira, xefe departamentu sira para sira bele iha hodi hatene sira nia orsamentu hira, sira bele hahú ona halo pedidus mai komando,” nia informa.
Nia deklara, orsamentu milhaun US$ 43 nee, milhaun US$ 5 aloka ba bens servisus no kapitál menor.
“Milhaun US$ 43 nee ba saláriu deit, nee atu kobre ba saláriu, iha milhaun US$ 5 nee mak kobre ba beins de servisus ho kapitál menor nee mak hadia kareta sira nee, sosa kombustível, pesas sira nee ho nesesida de ofísiu nian,” nia adianta.
Enkuantu objetivu husi enkontru nee, Komando Jerál Polísia Nasionál Timor Leste realiza enkontru ho komandante munisípiu, unidade, xefe departamentu no diretór diresaun sira hodi fahe livru orsamentu fiskál 2026, atu sira hatene alokasaun orsamentu no bele hahu ezekusaun programa no atividade sira iha kada estrutura PNTL.
Komandante Munisípiu, Unidade no Departamentu sira bele haree livru orsamentu neebe atribui ba sira no halo pedidu ba Komando Jeral, atu depois prosesa liu husi departamentu relevante hanesan finansas hodi prepara CPVS ba prosesu aprovizionamentu.
(jen)
