DILI, STLTIMORLESTE.com – Polisia Nasionál Timor Leste (PNTL) liu husi Komando Munisípiu Dili apela ba adeptus sira kontinua kumpri ba regras neebe iha too jugu Desportu Comunidade dos Países de Língua Portuguesa (CPLP) ba dala XII remata.
“Ita kontinua apela ba adeptus sira atu kumpri ba regras neebe mak iha, nunee labele ultrapasa moru bainhira la autoriza, tenke evita,” informa Komandante Munisípiu Dili, Superintendente Xefe Polisia Orlando Gomes ba jornalista sira iha Komando PNTL Munisípiu Dili, Kuarta nee (23/07/2025).
Nia dehan, PNTL nafatin avizu ba adeptus sira atu tuir regras nafatin, atu nunee labele hamosu insindente ruma iha mumentu Jogus CPLP nian.
“Ita nafatin avizu ba sira para evita labele hamosu insindente ruma iha momentu neeba. Tanba iha momentu neeba ita nafatin avizu ba adeptus sira labele sae moru, tanba bele impaktu ba eletrisidade dala ruma bele soke, tanba nee mak ita nafatin avizu,” nia esplika.
Nia deklara, klaru duni adeptus barak mak interese atu asiste jogu, nunee sira ho maneira oinsa bele asiste, maibe nafatin fo avizu ba sira atu evita labele sae moru, tenke kumpri regras.
Antes nee Segundu Komandante Jerál PNTL, Komisariu Polísia Pedro Belo apresia seguransa PNTL asegura abertura jogu Desportu Eskolar CPLP epoka 2025 iha Estadiu Munisípal Dili lao diak ho susesu too agora.
Nia hatutan, iha abertura jogu Desportu Eskolar CPLP epoka 2025, autoridade seguransa PNTL dedika sira nia aan tomak ho sakrefisiu, maske kolen, maibe lao diak too remata.
“Hau apresia tebes seguransa ohin abertura jogu Desportu Eskolar CPLP nee lao diak tebes, hau fo parabens ba imi hotu, maibe karik iha naksala balun ita hadia no aban nian nomos ita kontinua asegura atividade jogu Desportu Eskolar CPLP epoka 2025 iha Timor Leste tenke lao diak,” nia afirma.
(jen)
