DILI, STLTIMORLESTE.com – Relasiona ho vidio neebe viral iha media sosiál nee Polisia Nasional Timor Leste (PNTL) kaptura ona suspeitu estudante neebe mak hatudu hahalok bandalizmu hodi halo asaun fiziku liu husi tahan pasajeiru sira iha dalan neebe ho mikrolete 010 liu iha dalan publiku diresaun Tasi-Tolu too BJ Habibie, akontese iha loron 29 Maiu foin lalais.
Hatete Komandante Operasaun Munisípiu Dili, Superintendente Asistente Polísia Luis Amaral ba jornalista sira iha Komando PNTL Munisipiu Dili, Segunda (02/06/2025).
Nia dehan, hafoin video neebe espalha iha media-sosial, Polísia Nasionál Timor Leste (PNTL) liu husi Komandu Munisípiu Díli (KMD) asegura ona suspeitu neebe baku pasajeiru iha dalan.
“Kazu neebe mak viral iha media-sosiál konaba estudante ne’ebé asalta pasajeirus iha mikrolet laran, ami simu ona orientasaun husi Komandante Jerál PNTL, ami koordena ho Ofisiál Polísia Eskola hodi buka tuir suspeitu sira no ami kaer ona,” nia tenik.
Nia esplika, suspeitu sira husi Eskola 10 de Dezembru, tanba nee mak KMD informa ba Ofisial Polísia Eskola hodi bolu Diretor Eskola nomos Formador Aula nian hodi bolu estudante sira no sira konsege asegura ona suspeitu iha Eskola.
“Ami asegura ona suspeitu nain ida nomos ami sei kontinua ba asegura hotu suspeitu sira nee hotu tanba ami konsidera aktu sira neebe estudante halo nee krimi,” nia informa.
Nia hatutan, estudante halo asaun violasaun hasoru pasajeirus iha kareta laran nee krimi, tanba nee prosesu lao nafatin.
“Ami buka uluk suspeitu sira, ami asegura hotu mak ami buka fali motorista mikrolet atu sai sasin ba akonselamentu neebe Estudante sira halo ba pasajeirus refere,” nia deklara.
Enkuantu informasaun neebe STL asesu, akontese nee too agora Komando PNTL Munisipiu Dili sediauk simu keixa husi vitima sira, maibé tanba haree ba krimi, nunee ekipa polisia sira kontinua buka tuir suspeitu sira. bainhira asegura hotu suspeitu sira mak autoridade seguransa sei submete prosesu kazu nee ba Ministeriu Publiku hodi prosesa tuir lei.
(jen)
