DILI, STLTIMORLESTE.com – Polisia Nasionál Timor Leste (PNTL) asegura ona sidadaun ida ho inisial AC, neebe estraga ai-oan neebe kompanhia kuda iha Jardin Aimutin.
“Hafoin ita rona informasaun, Komando Munisipiu Dili orienta kedas eskuadra Dom Aleixo no servisu sekreta informasaun tun kedas ba fatin akontesimentu hodi buka tuir suspeitu no ita kaptura kedas,” hatete Komandante Munisípiu Díli, Superintendente Xefe Polísia Orlando Gomes ba jornalista sira iha Eskuadra Dom Aleixo, Sesta nee (11/07/2025).
Nia dehan, PNTL liu husi Eskuadra Dom Aleixo no Servisu Sekreta Informasaun kaptura suspeitu hodi mai halo identifikasaun no sei halo prosesu ba Ministériu Públiku (MP).
“Informasaun neebe ita rekolha katak sidadaun nee moras mental, maibe prosesu ami halo hotu ona no ami sei entrega ba parte saude nian, liu-liu doutor sira atu bele haree nia kondisaun moras mental duni ka lae? ita hein,” nia esplika.
Nia informa, jardin neebe iha Postu Penal Aimutin nee kompanhia kria no kuda ai-oan hamutuk 15 inklui aifunan atu hafurak sidade Dili, maibé suspeitu AC estraga no koa hotu nia tahan no hun.
“Suspeitu AC neebe ita kaptura mai halo identifikasaun entrega ba Ministeriu Públiku hodi halo prosesu tuir lei neebe iha, tanba aktu neebe ita nia sidadaun komete nee ita konsidera krimi, tanba tuir lo-loos ita hotu tenke proteje ita nia jardin sira iha kapital Dili.
Nia tenik, tanba nee husu ba Xefe Aldeia no Xefe Suku sira inklui Konselhu Polisiamentu Komunitariu (KPK) atu toma responsabilidade ba komunidade sira hodi kuidadu no asegura ita nia jardin sira iha kapital Dili.
“PNTL forma KPK iha suku 33 iha hotu ona, ne’ebé durante sira halao sira nia funsaun no sira sempre servisu hamutuk ho Ofisial Polisia Suku (OPS) no mos autoridade lokal sira hodi halo monitorizasaun ba sira nia bairu sira neebe sira destaka ba,” nia deklara.
(jen)
