BAUKAU, STLTIMORLESTE.com – Polisia Nasional Timor Leste asegura Timor Leste (TL) nia adezaun ba ASEAN, neebe sei selebra iha loron 26 Outubru tinan nee.
Timor Leste nia adezaun ofisialmente sai membru ASEAN, tuir planu sei akontese iha loron 26 Outubru 2025, sei selebra liu husi asina paktu iha Kuala Lumpur, adezaun ida nee nuudar momentu importante, tanba nee Governu Timor Leste liu husi Ministeriu Administrasaun Estatal (MAE) aloka orsamentu ba kada Munisipiu hodi Autoridade Munisipiu hamutuk ho entidade hotu festeza loron refere.
Tanba nee instituisaun seguransa PNTL liu husi Komando Polisia Munisipiu Baukau, enkontu ona ho Komadante Seksaun sira hotu inklui Komadante Ordem Batalhao Publiku (B.O.P) Baukau, atu fo seguransa masimu iha festeza refere neebe sei realiza mos iha Munisipiu Baukau.
“Enkontru ohin loron nian hamutuk ho seksaun sira iha Kuartel, Komandan Eskuadra Baukau, Komadante B.O.P kompanhia bravo atu konsolida oinsa atu asegura paz no estabilidade iha momentu espesial Timor-Leste adezaun ASEAN nian neebe Baukau sei halao hahu husi loron 25,” hateten Segundu Komadante Komando Polisia Munisipiu Baukau, Superintendente Asistente, Fasiu de Jesus Lima ba jornalista sira, hafoin remata enkontru iha edifisiu Polisia Baukau, Vila Nova, Sesta (24/10/2025).
Komadante nee konsidera, Timor-Leste nia adezaun ba ASEAN nuudar momentu importante no marka istoria foun ba Timor oan hotu, tanba Timor-Leste konsege utrapasa dezafiu lubuk ida, maibe legalmente sai membru plenu ASEAN neebe sei selebra iha loron 26 Outubro 2025 iha Kuala Lumpur.
Nunee ba eventu refere Komando Polisia sei halao seguransa masimu, maibe bainhira iha entidades balu tenta halo perturbasaun, Polisia sei la tolera.
“Mais hau fiar katak Timor oan tomak espesialmente iha Munisipiu Baukau sei servisu hamutuk oinsa mak bele garante nafatin pas no estabilidade ba iha prosesu adezaun ida nee,” Fasiu katak.
Tanban nee husu entidades hotu iha Suku 62 husi Postu 8 neebe eziste iha Munisipiu Baukau, atu nafatin mantein kolaborasaun ho seguransa kria pas no estabilidade iha Baukau.
Jornalista: Tomas Reis
Editora: Carme Ximenes
