DILI, STLTIMORLESTE.com – Komando Polisia Nasionál Timor Leste (PNTL) Munisipiu Dili liu husi Eskuadra Dom Aleixo atende kazu insidente hamutuk 10 no kazu balun prosesu ba Ministeriu Públiku (MP).
Komandante PNTL Munisípiu Dili, Superintendente Xefe Polísia, Orlando Gomes dehan, insidente neebe akontese iha loron paskua hahu husi loron Kinta feira santa too Domingu resurreisaun nee PNTL rejistu kazu 10.
“Husi kazu 10 nee ita haree husi tipu kazu DV tolu, kazu arma braka ida, kazu asaltu ida, iha mós kazu ofensa integridade fizika simples iha lima,” hatete Superintendente Xefe Polísia, Orlando ba jornalista sira iha Eskuadra Dom Aleixo, Dili, Segunda (21/04/2025).
Nia esplika, kazu hamutuk 10 nee iha kazu balun sira rezolve tuir familia, maibe iha kazu balun neebe keixa ona iha Komado Munisipiu Dili no sei kontinua prosesu para aprezenta ba iha Ministeriu Públiku (MP).
No kazu neebe akontese nee iha Postu Administrativu Nain Feto mak Kristu Rey iha kazu ida, Vera Cruz iha kazu ida nomos Dom Aleixo kazu ida.
“Kazu sira simples ita la detein ema ida iha sela, ita detein 72 depois ita husik livre fali,” nia deklara.
Entertantu, Komando PNTL Munisipiu Dili liu husi Eskuadra Dom Aleixo foti ona joven nain 5 mai iha Eskuadra Dom Aleixo iha loron Tersa feira, 07 Janeiru tinan 2025, hodi halo identifikasaun, relasiona ho kazu baku malu neebe viral iha media sosial no kazu refere akontese iha area Komoro, Raikotu, Postu Administrativu Dom Aleixo iha loron Segunda feira, semana nee.
(jen)
