BAUKAU, STLTIMORLESTE.com – Komando Polisia Munisipiu Baukau koloka membru apoiu seguransa iha kada igreja, hodi garante pas no estabilidade durante selebrasaun festa paskua.
Komandante Interinu Komando Polisia Munisipiu Baukau, Superintendente João Sancho Pires esplika, Komando Polisia Munisipiu Baukau simu ona orientasaun husi Komando Jeral hodi koloka membru sira iha kada igreja atu garante estabilidade durante selebrasaun festa paskua, tanba misa sei selebra iha tempu kalan neebe partisipa masimu husi sarani sira.
“Hahu kedas iha Domingu Ramos, entermus situasaun iha Baukau lao kontroladu, tanba ita koloka membru sira iha igreja Baukau laran, ba misa Kinta, Sesta no Sabadu kalan ita iha tiha ona planu operasaun,” hateten João Sancho Pires ba jornalista sira iha Vila Nova, Baukau, Kuarta (16/04/2025)
Nia sublina, planu Komando Polisia Munisipiu Baukau apoiu seguransa ba festa paskua hahu kedas iha Domingu Ramos, maibe sei kontinua apoiu too Domingu Resorisaun.
Nia fundamenta, durante seguransa ba selebrasaun festa paskua sei apoiu husi Ordem Batalhao Publiku no Komando Komponente Forsa Terrestre, nunee bainhira akontese asaun konflitu ruma, Komando Polisia Baukau prontu utiliza forsa hodi atua.
“Ita nia intensaun misa paskua nian lao ho diak, maibe se deit mak hakarak atu koko buat ruma iha terenu, polisia prontu atu atua, tanba polisia la mesak,” nia argumentu.
Komandante interinu nee husu entidades hotu atu apoiu servisu seguransa iha selebrasaun misa, tanba festa paskua nuudar selebrasaun ba Jesus Kristu nia mate no moris hias hodi ema nia sala.
Nunee mos husu entidades sira, bainhira festa paskua mak iha asaun ruma no parte polisia la konsege hetan informasaun lalais, bele liga ba Autoridade Postu no Suku inkui mos Konselhu Polisiamentu Komunitariu neebe estabelese ona iha kada Suku, nunee aselera fo informasaun ba Komando hodi halo atuasaun.
Entretantu lista igreja neebe Komando Polisia Munisipiu Baukau simu ba selebrasaun festa paskua hamutuk 26, kapela 49 no estasaun 9 neebe estabelese iha Postu Administrativu 8, Suku 62 ho Aldeia 281.
(tom)
