BAUKAU, STLTIMORLESTE.com – Komando Polisia Nasional Timor-Leste (PNTL) Munisipiu Baukau kontinua garante seguransa ba sidadaun sira nia vida no rikusoin nasaun nian iha tasi laran no rai maran.
Deklarasaun nee hatoo husi Komadante Komando PNTL Munisipiu Baukau, Superintendente Xefe Polisia, Antonio Maria De Sa ba jornalista sira iha resintu Administrasaun Munisipiu Baukau, Kuarta (06/11/2024)
“Hanesan Instituisaun Estadu neebe mak tuir mandatu konstituisaun RDTL hatudu iha Artigu 147 no 146 kona-ba Forsa Defeza Timor Leste ita kontinua nafatin garante pas no estabilidade ba iha ema nia vida inklui rikusoin,” dehan Superintendente Xefe Polisia, Antonio.
Komandante nee fundamenta, Instituisaun PNTL iha nia estratejia operasaun hamutuk ho F-FDTL neebe konsagra ona hodi garante pas no estabilidade, nunee sidadaun sira nia movimentu livre iha 24 oras inklui fo seguransa ba rikusoin nasaun nian neebe iha eziste ona.
Maibe parte seguransa sei la mesak hodi haree asuntu refere, tanba nee kontinua halo koordenasaun ho entidades hotu husi Munisipiu too nivel Aldeia sai kamada neebe forte hodi fo solusaun ba sustentabilidade.
“Kestaun pas no estabilidade nee xave importante, entaun ita hotu tenke iha komitmentu oinsa fo apoiu masimu para dezenvolvimentu diak,” nia tenik.
Nia argumenta, Komando Munisipiu Baukau kontinua preparadu hodi asegura situasaun, tanba iha ona planu husi Governu neebe sei simu bainaka husi nasaun membru ASEAN nian hodi realiza enkontru importante iha Baukau, tanba nee presiza ambiente neebe diak hodi simu bainaka refere tuir tempu planu Governu nian.
De Sa husu Baukau oan tenke prepara aan no apoiu nafatin parte Autoridade Seguransa sira hodi kria ambeinte neebe seguru hodi asegura kualker situsaun iha Baukau.
(EST 2)
