BAUKAU, STLTIMORLESTE.com – Komando Polisia Munisipiu Baukau destaka ona Komadante Eskuadra ba Postu Administrativu foun rua iha Munisipiu Baukau.
Komadante Komando Polisia Munisipiu Baukau, Superintendente João Sancho Pires informa, iha loron 01 Julhu 2025, Polisia Nasional Timor Leste liu husi Komando Polisia Munisipiu Baukau ofisialmente fo pose komadante Eskuadra 6 no komandante Seksaun 11 iha Komando Polisia Munisipiu Baukau.
Nia sublina, serimonia tomada pose refere bazeia ba despaisu Komando Jeral Nu. 311/CG-PNTL/VI/2025, tanba nee ofisialmente fo pose mos ba Komadante Eskuadra ba Postu foun rua hanesan Postu Kelikai Antigu no Matebian hodi atende servisu polisia nian servi povu no nasaun.
“Primeiru ita iha tranzitoria ita lao tiha ona, ita hasae fali proposta ba Komando Jeral nomeia asisten inspetor too asisten superintendente foti pozisaun 11 seksaun iha Komando Munisipiu 8 ba Eskuadra iha Baukau hamutuk ho segundu Komadante Eskuadra aumenta Matebian ho Kelikai Antigu ohin ita toma pose,” hateten João Sancho Pires ba jornalista sira iha Vila Nova Baukau, Tersa (01/07/2025).
Nia argumentu, serimonia tomada pose nee Xefe seksaun sira inklui komandante Eskuadra ba Postu Ualu halo ona juramentu, neebe sei servi deit povu no nasaun liu husi servisu hamutuk ho Autoridade Suku sira iha nivel Postu Administrativu.
Komandante nee deklara, mezmu edifisiu ba Komando Eskuadra iha Postu Administrativu rua foun seidauk iha, maibe liu husi koordenasaun ho Autoridade Postu no Suku sei oferese edifisiu sira neebe iha ona, nunee parte seguransa bele utiliza hodi halao servisu polisia nian iha baze.
Maibe Komando Polisia Munisipal diriji ona proposta ba Komando Jeral hodi haree asuntu refere liu-liu konstrusaun edifisiu Eskuadra Poliasi nian iha Postu Administrativu foun rua refere.
“Ita nia proposta halo Eskuadra foun rua sae tiha ona, hein Komando bele atende, maibe Komando seidauk atende mos ita koloka ona, tanba ezijensia komunidade nian importante hakarak ga lakohi ita tenke koloka,” João Sancho Pires akresenta.
Entretantu Komando Eskuadra ba Postu Kalikai Antigu mak, Inspetor Xefe Justino do Carmo Fernades ho Segundu Komadante, Inspetor Leonardo da Costa Freitas, enkuantu ba Postu Administrativu Matebian Komadante Eskuadra lidera husi Inspetor Xefe José Antonio Soares ho nia Segundu Komadante Inspetor Antonino Freitas.
(tom)
