DILI, STLTIMORLESTE.com – Komando Polisia Nasional Timor Leste (PNTL) liu husi Komando PNTL Munisípiu Dili, detein ona suspeitu JRX iha sela detensaun Eskuadra Polísia Dom Aleixo Aimutin, inklui asegura arma branka tudik.
Segundu Komandante PNTL Munisipiu Dili, Superintendente João Sancho Pires haktuir, informasaun autoridade seguransa simu husi familia balu kontaktu ba iha Eskuadra Polísia Kristu Rei, membru sira konsege ba too iha lokal krimi, haree suspeitu kaer hela sasan kroat iha liman hodi hamriik iha odamatan, maibe vítima BS ho kondisaun isin rua laiha ona iis ka mate hela iha uma laran, João Sancho Pires haktuir situasaun nee akontese Polísia investigasaun Kristu Rei, kontaktu imediata Polisia Forensik, hodi too iha fatin akontesimentu asegura vítima no evakua ba Mortuariu Hospital Nasional Guido Valadares.
“Suspeitu, Polisia kaptura fragrante de lito, ita lori tiha nia ba iha Sentru Saude Bekora, tanba suspeitu mos tenta oho aan iha parte hirus matan maibe la ho kondisaun grave, hafoin tratamentu hotu mediku fo resposta katak suspeitu kanek kmaan no bele fila, nunee polisia investigasaun Kristu Rei nian evakua suspeitu ba iha sala detensaun hodi kumpri oras 72, hafoin submete ba Ministériu Publiku,” dehan Superintendente Joao ba jornalista sira iha Kaikoli, Dili, Segunda nee (21/10/2024).
Kazu nee tuir nia, tama iha kategoria omisidiu agravadu, tanba suspeitu sona mate ninia feen ho kondisaun isin rua.
“Ita seidauk bele koalia, klaru vítima mate ho kondisaun isin rua, maibe ita seidauk hatene bebe iha inan nia kabun laran fulan hira. Nunee ita hein prosesu autopsia foin mak determinante ba labarik iha vítima nia isin nee fulan hira,” katak nia.
Tanba tuir nia, informasaun neebe Polisia rekolha ka hetan, katak motivu husi kazu omisidiu nee kauza husi deskonfia malu, kazu deskonfia malu nee ninia prosesu lao hela. Iha momentu ba asegura suspeitu, asegura armas neebe suspeitu lori oho ninia feen, agora iha ona parte investigasaun ninia liman.
“Ita kontaktu Ministériu Publiku, se bele aselera oituan prosesu nee ba Primeiru interrogatóriu, kuandu ita konfirmadu ona aprezenta imediata ba MP,” hatete Joao.
Entretantu kazu nee akontese iha loron 20/10/2024, oras 01:45 area iha Bekora.
(mar)
