DILI, STLTIMORLESTE.com – Polísia Nasional Timor Leste (PNTL) detein ona suspeitu ho inisial VAC neebe envolve iha kazu Omisidiu agravadu no ofensas integridade fizika grave neebe akontese iha loron 29 Novembru tinan nee, iha tuku 06:30 dader, hodi rezulta vítima Xefe Aldeia Metir Miguel Coreia do Santos, idade 50, ho suspeitu nia feen Augusta de Deus kanek grave iha area Dargeo, Aldeia Metir, Suku Fatumasi, Postu Administrativu Bazartete, Munisípiu Likisa.
Porta Voz PNTL atual Diretor Diresaun Servisu Investigasaun Kriminal (DSIK), Superintendente Polísia João Belo do Reis dehan, kazu omesidu agravadu no ofensas integridade grave nee akontese iha loron (29/11/2025) tuku 06:30, suspeitu ho naran inisial VAC lori besi baku mate Xefe Aldeia Metir Miguel Coreia do Santos mate fatin, deskonfia vítima xefe aldeia nia alin mane iha relasaun domin ho suspeitu nia feen.
Nia tenik, bainhira suspeitu VAC baku mate tiha vítima Xefe Aldeia Metir nee, suspeitu mos lori arma branka sona nia feen neebe ho kondisaun gravida, rezulta kanek grave, tanba suspeitu deskonfia vítima xefe aldeia nia alin mane iha relasaun domin ho suspeitu nia feen vítima Augusta de Deus.
Hafoin akontese PNTL Munisípiu Likisa halo kedas atendimentu ba vítima mate isin Xefe Aldeia Metir Miguel Coreia do Santos ba HNGV hodi submete ba prosesu autopsia tuir prosedimentu lei, kontinua halo kordenasaun lideransa komunitariu ho joven sira buka tuir suspeitu VAC.
“Bainhira ita nia Polísia Eskuadra Polísia Bazartete simu informasaun katak, kazu omesidu Suspeitu VAC baku mate vítima Xefe Aldeia Metir no suspeitu sona kanek nia feen rasik, tanba deskonfia vítima xefe aldeia Metir nia alin mane iha relasaun domin ho suspeitu nia fen vítima Augusta de Deus mak suspeitu halo asaun baku mate vítima Xefe Aldeia Metir no nia feen gravida kanek grave too rezulta baixa iha ICU HNGV hodi hetan testamentu intensivu,” informa nia ba jornalista iha Komando Jerál PNTL Dili, Segunda (01/12/2025).
Nia deklara, bainhira suspeitu komete tiha kazu omesidu, nia halai husi fatin akontesimentu. Nunee lideransa Komunitariu ho joven sira hamutuk ho PNTL Munisípiu Likisa halo operasaun konjunta buka tuir suspeitu iha loron 30 de Novembru 2025 tuku 01:30 meudia konsege kaptura iha ai laran, area baliza entre suku Fahilebo ho Suku Fatumasi nia klaran, hodi kontinua kedas transporte ba Komandu PNTL Munisípiu Likisá nia fatin hodi halo investigasaun.
“Kazu omesidu nee ita nia servisu investigasaun kriminal Munisípiu Likisa halo prosesu rejista ho NUK 0104-LIBZT, kontinua detein suspeitu VAC iha sela PNTL Likisa, molok aprenzenta ba Ministeriu Publiku hodi kontinua interogatoriu dahuluk iha tribunal atu foti desizaun, tanba nee PNTL hakarak agradese ba lideransa komunitariu ho komunidade sira apoiu servisu PNTL konsege detein suspeitu ba kazu omesidu,” nia afirma.
Iha parte seluk jornalista koko atu intervista ho vitima neebe baixa hela iha HNGV, maibe la fo tanba kondisaun seidauk rekopera.
Jornalista: Jeniche da Costa
Editora: Domingas Gomes
