DILI, STLTIMORLESTE.com – Iha Tersa horiseik Polisia Nasional Timor Leste (PNTL) detein suspeitu kazál nain rua (2) ho inisial TDS no H neebe envolve krimi Online Shopping Scam hodi bosok vitima ho inisial FHB, hodi transfere osan ba sidadaun ida iha Indonezia molok foti premiu ho osan boot.
Hatete Diretor Diresaun Servisu Investigasaun Kriminál Nasionál, Superintendente Polísia João Belo dos Reis ba jornalista sira iha Komando Jeral PNTL Kaikoli, Dili, Kuarta (16/07/2025).
Nia dehan, suspeitu nain 2 nee rekruta husi sidadaun Indonézia hodi sai hanesan agen iha Timor Leste, hodi uza meus operandi halo promosaun ba sasan sira hanesan kareta no motór faan ho presu kiik US$ 2000 hola ida gratuitu ida no mós halo promosaun ba sorteiu neebe lori artista Rafi Hamad no Baimyong nia foto iha facebook, katak partilha foto sei hetan sorteu ho osan boot no osan bonus balun.
Nunee iha Segunda (14/7/2025) foin daudaun iha sidadaun feto ida ho inisial FHB ba iha Timor Plaza, halo transasaun osan tuir saida mak iha rede sosiál, nunee nia halo transasaun osan ho montante US$ 2000.
Nia esplika, bainhira sidadaun nee atu halo tranferensia osan ba Indonézia, Servisu Intelijennsia Polisia konsege deteta asaun nee no konsidera nuudar krimi Online Shopping Scam no halo kedan prevensaun hodi asegura vitíma hodi lori ba iha Diresaun Servisu Investigasaun Kriminál Nasionál Kaikoli hodi hatoo keixa.
“Hakarak informa ba maluk sira hotu katak iha Segunda feira Diresaun Investigasaun Kriminál simu keixa husi sidadaun Timoroan ida neebe sente ofendidu ba transasaun iha online ne’ebé autór sira husi estrajeiru lansa iha media sosiál.
Nia deklara, nunee noriseik ekipa Diresaun Servisu Investigasaun Kriminál neebe lidera husi Inspertór Xefe Polísia Aquiles Dias halo operasaun halo tranking no infiltra ba iha transasaun nee no konsege deteta asaun nee.
“Nunee ami detein kazál nain 3, sira nain 2 nuudar agen ba iha sidadaun Indonézia neebe fasilita hodi habosok ita nia populasaun ka ita nia komunidade iha Timor Leste liu husi online,” nia informa.
Nia informa, suspeitu nain 2 nee lansa propopoganda falsu iha media sosial ho maneira públikasaun sasan baratu iha media sosial hanesan kareta, motor, telefone no seluk-seluk tan, nunee komunidade sira atraidu bá propaganda falsu sira nee hodi haruka osan ba suspeitu neebe iha estranjeiru.
“Modus operandi ida nee sira uza mos Timoroan hanesan ohin hau mensiona kazal nee, depois kazal Timoroan nee fasilita informasaun no rekolha informasaun i depois lansa mos informasaun hodi atrai ita nia komunidade sira,” nia koalia.
Tanba nee, PNTL hakarak informa ba públiku katak, ba komunidade sira atu halo transasaun karik tenke hatene lo-loos fornesedor husi sasán neebe ita hakarak hola.
“Tenke hatene mos nia legalidade normal ka la normal, ilegal ou legal, tenke hatene didiak mak haruka osan para ita labele sai vítma ba transasaun online ka transaksaun neebe mak iha,” nia haktuir.
Nia hatutan, PNTL hamutuk ho institusaun sira seluk, hamutuk ho maluk jornalista sira tenke eduka nafatin komunidade sira hodi hatene krimi online sira hotu no labele sai vitíma ba transasaun neebe bele prejudika sira.
“Tanba ita nia vitima horiseik nee konsege haruka osan lubuk ida ba liur kuaze US$ 6000, nunee nia sente prejudikadu ba asaun ida nee nia hatoo keixa, nia sente katak transasaun ne’ebé mak nia halo nee bosok,” nia subliña.
Komandante nee dehan, PNTL konsidera atu transasaun online nee krimi ba falsifikasaun no krimi ba burla no krimi ba sira seluk, PNTL sei dezenvolve hela hodi bele akuza ba suspeitu sira neebe mak involve iha krimi nee.
Nia afirma liu tan katak, PNTL ho ninia parseiru sira iha estranjeiru no mos iha Timor sei buka tuir nafatin rede ida nee, hodi Timoroan labele sai vitima tanba tipu krimi hanesan nee barak ona.
“Vitima sira ba kazu hanesan nee barak ona, tanba nee husu ba públiku atu koopera kuandu iha modus sira hanesan mosu iha facebook hodi habosok imi favor informa mai polísia hodi foti asaun ba ida nee.
(jen)
