DILI, STLTIMORLESTE.com – Komando Polísia Nasionál Timor Leste (PNTL) liu husi Komando PNTL Munisipiu Dili, asegura seguransa ba Sesta feira iha Golgota, atu nunee sarani sira halao via sakra Sesta feira Santa nia halao ho diak.
“Ita nia PNTL asegura seguransa ba ita atu halao atividade via sakra Sesta Feira Santa iha area Golgota,” hatete Komunidade Gilberto dos Santos ba STL iha Golgota, Suku Komoro, Dili, Sesta (18/04/2025).
Nia dehan, via sakra Sesta feira santa nee importante tebes-tebes ba sarani tomak iha mundu, tanba loron nee loron neebe Jesus mate no loron tolu nia mors hias fali.
“Ita tenke arepende ita nia sala, tanba loron Sesta feira santa ne’e ita hanoin hikas Jesus mate iha Kruz tanba ita ema nia sala,” nia esplika.
Observasaun STL nia iha terenu, Komando PNTL Munisipiu Dili liu husi Eskuadra Polisia Dom Aleixo asegura seguransa ba estasaun ida husi Parokia Komoro halao via sakra Sesta Feira Santa iha area Golgota, Suku komoro.
Aleinde nee, durante via sakra iha Sesta feira santa nee situasaun seguransa iha area Golgota lao diak, tanba hetan seguransa masimu husi PNTL Munisipiu Dili eskuadra Dom Aleixo no hetan apoiu masimu husi seksaun Rezerva Intervensaun Rapida (RIR), Unidade Espsial Polisia (UEP), seksaun Tranzitu Seguransa Rodaviariu, Polisia Komunitariu no Ofisial Polisia Suku Komoro iha area juridiku Dom Aleixu Munisipiu Dili nian.
(jen)
