DILI, STLTIMORLESTE.com – Komando Polísia Nasional Timor Leste (PNTL) liu husi Departamentu Forensik entrega rezultadu teste Deoxyribo Nucleic Acid (DNA) restu mortais Saudozu Lino da Costa ‘Olo-Cassa’ ba Komando FALINTIL-Forsa Defeza Timor Leste (F-FDTL)
Komandante Jeral PNTL Komisariu Jeral Polísia, Henrique da Costa hatete, rezultadu teste DNA ba restu mortais saudozu Olo-Cassa deskobre pozitivu, katak restu mortais nee Saudozu Olo-Cassa duni.
“Ita membru PNTL sira lori sampel nee ba koko iha Indonezia, nee mak ninia rezultadu hanesan ohin hau aprezenta iha nee katak, ninia rezultadu nee pozitivu,” dehan Komisariu Jeral Polísia, Henrique ba jornalista sira iha Quartel Jeral PNTL, Kaikoli, Dili, Kinta (07/11/2024).
Nia dehan, ida nee hanesan fo pasu pozitivu ba PNTL liu-liu ba servisu investigasaun kriminal nasional, tanba ida nee foin primeira vez halo identifikasaun ba mate ruin.
“Nafatin husu ita boot sira hotu nia apoiu, karik hanesan buat ruma ita prontu para apoiu, nunee halo identifikasaun,” katak nia.
Nia akresenta, servisu ida nee komplikadu tebes, maibe membru polísia neebe hetan formasaun ka hetan treinamentu espesifiku ba ida nee sira mos iha kapasidade sevisu hamutuk bele halo teste sira hanesan nee.
Iha fatin hanesan, Sekretariu Estadu ba Asuntu Veteranu , Cesar dos Santos da Silva “Merak” hatutan, ezaminasaun ba saudozu Olo-Cassa nia restu mortais nee primeira vez bele deteta ona katak, loos duni mate-ruin ida nee pertense duni ba família oan kiak sira neebe ke husi família Lino da Costa ‘Olo-Cassa’ ninian.
“Tanba ida ne mak hau lori Ministeriu ba Asuntu Kombatentes Libertasaun Nasional hatete deit katak, agora ministeriu en-koordenasaun ho instituisaun relevante, liu-liu PNTL para depois ami haree prosesu ida nee,” katak nia.
Nia dehan, ida nee hanesan primeira faze, no tuir mai Ministriu Asuntu Kombatenete Libertasaun Nasional sei haree nafatin, tanba restus mortais nee balu agora daudaun iha hela Hospital Nasional Guido Valadares para atu submete ba iha prosesu teste .
Entretantu oan mane husi saudozu Olo-Cassa, Domingos Correia agradese Komando PNTL no ba Komando F-FDTL neebe inisia prosesu sira nee.
(mar)
