BAUKAU, STLTIMORLESTE.com – Komando Polisia Nasional Timor Leste (PNTL) ho Komando FALINTIL-Forsa Defeza Timor Leste (F-FDTL) Komponente Terrestre Baukau, enkontru koordenasaun ba operasaun konjuntu iha Munisipiu Baukau, durante selebrasaun loron finadu iha tinan nee.
Deklarasaun nee hatoo husi Komadante Komando Polisia Munisipiu Baukau, Superintendente Xefe Polisia Antonio Maria De Sa ba jornalista sira hafoin remata enkontru ho Komadante Eskuadra husi Postu Administrativu 6 inklui Komando F-FDTL CT Lanud Baukau, iha Vila Nova, Sesta (25/10/2024)
“Komando PNTL ohin mos enkontru ho Komando F-FDTL Forsa destakadu CT komponente terrestre, ita sei produs planu operasaun konjuntu halo prevensaun ita tenta atu minimiza,” nia informa
Planu operasaun konjuntu nee tuir nia sei halo patrolhamentu atu garante seguransa ba komunidade sira iha kualker eventu, neebe selebra iha Munisipiu Baukau hanesan loron Matebian neebe besik ona.
Tanba kaulkel problema bainhira mosu iha Munisipiu Baukau, komando Polisia sei la tolera no sei atau tuir ordem komando, tanba nee krime nuudar inimigu ba ema hotu, nunee tenke elemina, maibe asaun krime neebe antes nee mosu iha Baukau, nee laos ema hotu nia hahalok, maibe nee ema ida rua nia hahalok neebe kauza husi lanu.
“Maibe medida prevene husi ita nia forsa 2 preve tiha ona, ita la tolera ba krime neebe akontese durante periodu loron boot nee, tanba Instituisaun Estadu nian ita garante nafatin Lei nee tenke funsiona garante ema hotu iha direitu sirkula iha loron boot nee,” nia akresenta.
Komadante Munisipiu neeb deklara, operasaun konjuntu ba selebrasaun loron finadu iha Baukau, parte seguransa sei halo mak hanesan, halo auto stop ba transporte publiku no privadu hodi halo identifikasaun ba sasan kroat, sei lao ain hodi iha tempu kalan, patrolha piadas inklui fo seguransa ba semiteriu publiku sira hotu.
(EST 2)
