DILI, STLTIMORLESTE.com – Força Tarefa Conjunta (FTC) kompostu husi Komando Polisia Nasional Timor Leste (PNTL) no Komando FALINTIL-Forsa Defesa Timor Leste (F-FDTL) lansa ona Operasaun Konjunta hodi tama sai bairu, asegura seguransa ba komemorasaun tinan 50 Loron Proklamasaun Independensia Repúblika Demokratika Timor Leste (RDTL) neebe sei realiza iha loron 28 fulan Novembru 2025.
Hatan Porta Voz Komando PNTL Superintendente Polísia João Belo dos Reis ba jornalista sira, Segunda (24/11/2025).
Nia dehan, preparasaun PNTL hamutuk ho F-FDTL agora daudaun halo hela preparasaun makaas ba seguransa loron 28 Novembru neebe sei akontese iha loron hirak tuir mai.
Tanba nee Komando PNTL husu ba maluk sira hotu atu akompanha, kontribui, hodi bele relata kualker informasaun sira neebe maluk sira hetan iha bairu idak-idak ba PNTL ho nia parseiru no aliadus sira bele responde tuir nesesidade sira neebe iha.
“Diretiva Operasional neebe mak Komando fo sai kobre ba buat barak, primeiru mak ami sei hadia prezensa patrulhamentu no movimentu iha area hotu-hotu, halo kontrolu tránzitu no prevene asidente sira iha estrada públiku sira, mantein Komunikasaun Direita ho Komando Operasional Distrital no mos Rejional sira, prontu responde rápida insidente sira neebe mak konsidera emerjensia, halo koordenasaun ho parte interligadu hodi ita halo prevensaun neebe mak diak liu tan,” nia esplika.
Superintendente Polísia nee hatoo mos mensajen ba públiku, komunidade, povu iha teritoriu Timor Leste laran tomak katak presiza kontribui paz, tranquilidade no ami konsidera paz no tranquilidade nee responsabilidade ita hotu nian.
“Responsabilidade koletivu atu garante ita nia nasaun seguru, hakmatek no hatudu ita nia nasaun neebe mak forte no diak ba mundu internasional,” nia deklara.
Nia informa, aleinde operasaun neebe mak sira halo, iha tan ekipa ida seluk neebe kompozisaun nee mai husi Ministeriu Interligadu neebe lidera husi Alfândega (Ministeriu Finansas) halo operasaun tama sai bairu, Estrada públiku sira iha Fronteira Terrestre, Marítima, iha Kosteria sira atu kontrola movimentu maluk sira neebe importa sasan neebe ilegal mai Timor Leste.
“Ami sei la fo dalan ba kualker importasaun neebe tama mai ilegal iha ita nia nasaun laran, karik iha loja ruma, iha kios ruma ou ema ruma faan sira nee iha ita nia rai laran, ami sei halo atuasaun,” nia hatutan.
Nia afirma, ekipa nee halo movimentu ba iha fatin hotu-hotu, neebe ami konsidera risku, iha posibilidade movimentu sasan sira nee.
Jornalista: Jeniche da Costa
Editor: Xisto Mendonça
