DILI, STLTIMORLESTE.com – Polisia Nasional Timor Leste (PNTL) liu husi Diresaun Tranzitu Seguransa Rodaviariu Nasional (DTSRN) halo operasaun foti obrigatoriu kareta neebe komunidade estasiona permanente okupa estrada publiku iha kapital Dili.
Komunidade Suku Comoro, Gil dos Santos husu ba Polisia Tranzitu tenke kontrola beibeik iha dili laran tomak neebe sidadaun sira sempre para kareta permanente iha estrada publiku.
“Ita husi Polisia Tranzitu sira mai foti hotu kareta aat sira neebe okupa estrada publiku sira, tenke lori ba kantor, depois kareta nain ba lori, sei lae lori ba lixu Tibar neeba,” hatete Komunidade Suku Komoro, Gil dos Santos ba STL iha Suku Komoro, Segunda feira (19/01/2026).
Nia esplika, ba oin nee tenke kria lei ida para regula sidadaun hotu-hotu neebe mak hakarak sosa motor ho kareta, DNTT tenke fo regra ba dealer sira hotu iha teritoriu laran tomak.
“Tenke kria lei ida para sidadaun ida sosa kareta ida motor ida, atu nunee prevene engrafamentu nomos hamenus kareta aat sira neebe para runranga iha sidade Dili, ema ida kareta ida para sosa mai para iha nia uma, rua tolu depois aat para fali iha estrada publiku nee labele,” nia Informa.
Entretantu observasaun neebe STL asesu, atividade Diresaun Tranzitu Seguransa Rodaviariu ( DTSRN) hahu iha loron Kinta feira 15 fulan Janeiru 2026 halo operasaun iha area Bairo Pite too Bekora, foti obrigatoriu komunidade sira nia karreta neebe utiliza Estrada publiku estasionamentu permanente.
(jen)
