DILI, STLTIMORLESTE.com – Komando Polisia Nasional Timor Leste (PNTL) hatún ona ordem ba Komando Munisípiu Díli hodi fo hatene ba membru PNTL sira atu garante seguransa ba festa paskua neebe sei akontese loron tuir mai.
Porta voz PNTL, Superintendente Polisia, João Belo dos Reis informa ba komunidade iha Timor laran tomak katak, PNTL halo esforsu hotu-hotu atu garante segurasan no ordem publiku durante priodu festa paskua nian.
“Nunee Komunidade sira neebe atu selebra atividade festa paskua nian nee ita garante lao ho diak,” hatete Superintendente Polisia João Belo dos Reis ba jornalista sira liu husi Konferensia Imprensa iha Kuartel Jerál PNTL Kaikoli, Dili, Tersa (15/04/2025).
Nia esplika, PNTL iha ona asaun konkretus Komando hatún ona diretiva operasional ba Komando Munisipiu Dili hodi orienta membru PNTL sira atu fo segurasan ba atividade paskua.
“Ami mos reforsa kolokasaun iha fatin estratejiku sira hanesan Igreja no sentru sira nomos dalan publiku sira hodi garante movimentu sarani sira ba mai no balun husi igreja ba uma,” nia deklara.
Nia informa, PNTL liu husi Departamentu Polisia Komunitaria mos halo esforsu makaas hodi halo koordenasaun diak ho Igreja nomos lider komunitariu sira, atu nunee durante segurasan neebe Polísia halao iha terenu lao ho diak.
“Iha mos ita nia OPS sira halao komunikasaun diak liu tan, ho parte ligadu ho parte suku nian para hetan infromasain neebe diak,noinsa PNTL halao nia servisu ho diak liu tan,” nia deklara.
Iha fatin hanesan, Xefe Suku Kaikoli, Hipolito Marques Sarmento informa, sempre iha kolaborasaun ho PNTL atu fo seguransa ba komunidade sira neebe sei selebra loron paskua, tanba loron nee importante tebes ba sidadaun hotu-hotu.
“Ita sempre iha linha koordenasaun neebe diak tebes ho PNTL atu fo seguransa masimu ba ita nia komunidade sira, atu nunee sira bele livre hodi selebra loron paskua, tanba loron nee importante ba ita hotu-hotu,” nia afirma.
(jen)
