DILI, STLTIMORLESTE.com – Komando Polisia Nasional Timor Leste (PNTL) liu husi Komando PNTL Munisipiu Dili orienta ona ba iha polisia Eskuadra Kristu Rei hodi buka tuir autor sira neebe mak tama Igreja Sagrada Korasaun de Jesus Bekora hodi naok osan eskomola.
“Kazu ida nee ita nia polisia nomos ita nia polisia servisu informasaun sekreta sira agora daudaun buka tuir hela suspeitu sira nee. Ita haree ona iha CCTV, tanba iha neeba CCTV mos iha, neebe ita sei buka hela , hetan sei halo kapturasaun,” hatete Komandante PNTL Munisipiu Dili, Superientendente Xefe Polisia, Orlando Gomes, iha Kampu Futebol Bekora, Tersa (03/02/2026).
Nia dehan, ligadu ba akontesimentu ne’e, komando PNTL Munisipiu Dili liu husi eskuadra Kristu Rei mos simu ona keixa husi parte igreja nian neebe mak husu atu buka no kaptura suspeitu sira hodi bele prosesa ba iha oin tuir lei.
“Los duni, sira husi parte igreja nian hatoo ona keixa ba iha ita nia polisia eskuadra Kristu Rei, tanba hahalok husi suspeitu sira nee konsidera krime, tanba naok osan neebe sarani sira kontribui liu husi esmola,” nia esplika.
Iha akontesimentu nee Sekretaria Konselhu Parokial Bekora, Fernando Xavier hatoo ona Keixa ba PNTL hodi buka tuir suspeitu sira no husi Autoridade Seguransa halo ona observasaun hodi hare Direta CCTV.
Nunee iha video CCTV hatudu katak, ema deskonhesidu sira nee haleu iha igreja laran durante oras lima nia laran, hodi foti sai osan esmola iha kofre rua hodi lao sai ba liur, hodi hasai osan neebe mak iha kofre rua nee laran.
Nunee mos tuir esplikasaun husi Sekretaria Konselhu Parokial Bekora, Fernando Xavier katak, osan iha kofre rua nee mai husi sarani sira neebe mak mai halo orasaun neebe hatoo kona-ba sira nia problema ruma no moras ruma liu husi ismola tau iha kofre laran. Maibe autor sira foti tiha kofre rua nee hodi ba selok tiha iha liur no hasai hotu tiha osan sira nee.
Nia afirma, autor sira nee foti tiha osan no soe hela kofre rua nee, hafoin iha dadersan alin sira ne’ebe servisu iha igreja mak hetan fila fali kofre rua nee, nunee mak ami asegura fila fali kofre ida nee.
Entretantu, tuir informasaun neebe STL asesu katak, kazu nee akontese iha Sabadu 31 Fevereiru 2026, iha oras tuku 11 kalan, deskonfia ema deskonhesidu nain-3 neebe mak uza hena taka oin metin, sobu janela hodi tama ba Igreja Bekora no foti osan esmola neebe tau iha kofre rua iha estatua Nossa Senhora nia ain.
(jen)
