DILI, STLTIMORLESTE.com – Komando Polisia Nasionál Timor Leste (PNTL) Munisípiu Dili hatun diretiva ba Seksaun Tránzitu Munisípiu Dili halao atividade servisu operasionál hodi halo prevensaun seguransa rodoviária iha kapitál Dili, liu husi ativitidade pasa revista ba motorizada hirak neebe halo movimentu iha estrada publiku, haree mós ba sasán kontra bandu sira seluk.
“Ita sempre haruka ita nia membru PNTL identifika cek poin iha tempu kalan,” hatete Komandante Munisípiu Dili, Superintendente Xefe Polisia, Orlando Gomes ba jornalista STL liu husi telefone, Domingu (13/07/2025).
Nia esplika, Seksaun Tránzitu Munisípiu Dili kontinua halao knaar operasaun rutina hodi halo Auto Stop ba motorizada sira neebe halo movimentu iha tempu kalan, ho objetivu atu halo prevensaun ba asidente tráfiku no dezenvolve kampanha seguransa rodoviária nunee bele eduka nafatin motorista sira hodi respeita lei tránzitu.
Entretantu observasaun STL nian iha terenu, iha atividade auto stop neebe halao iha area Kolmera Sabadu kalan hetan apoiu husi Servisu Informasaun Polísia Nasional junta Forsa Polisia, Makikit, Seksaun Forsa Rezerva no mos Eskuadra Nain Feto, hodi apoiu Seksaun Tránzitu Dili.
(jen)
