DILI, STLTIMORLESTE.com – Iha loron Sesta feira foin lalais nee estudante husi Eskola Ensinu Sekundáriu Tékniku Vokasionál (ESTV) 28 Novembru Bekora ho Eskola Sekundáriu Tékniku Vokasional Ekonomiku Komersiu (ESTV- EEC) Bekora istori malu no tuda malu, tanba nee Polisia Nasional Timor Leste (PNTL) hamutuk ho Diretor Eskola rua nee ho ninia profesor sira, halao mediasaun ba estudante sira, atu nunee labele akontese fila fali.
Diretor ESTV- EEC, Bekora, Bento Quintao dehan, iha loron Sesta foin lalais nee, iha konflitu entre estudante husi Eskola ESTV 28 Novembru Bekora ho estudante husi ESTV-EEC, Bekora tuda malu no seran malu, tanba nee husu akumula eskola rua nee hodi rezolve problema nee hodi kria pas no dame atu nunee haree liu ba aprendizajen.
“Iha Sesta liu ba ita nia eskola rua nee hetan tentasaun, sira istori malu no foti fatuk hodi tuda malu, maibe ita labele fo sala ba estudante husi eskola rua nee, tanba ida nee hanesan tentasaun ida neebe akontese ba ita hotu, entaun ohin ita hamutuk eskola rua hodi rezolve, laos eskola rua nee atu sai fali inimigu, maibe estudante mai iha nee atu aprende siensia, aprende matenek iha eskola ida nee, tanba imi juventude mak futuru ba nasaun ida nee nian,” hatete Bento ba jornalista sira iha Eskola ESTV-IT Bekora, Tersa (01/04/2025).
Nia esplika, joven mak futuru nasaun RDTL nian, tanba nee loron-loron mai eskola tenke aprende, tanba aban bairua joven sira mak troka jerasaun tuan sira.
“Joven mak futuru nasaun ida nee nian, imi tenke aprende siensia husi ita nia profesór sira, profesor sira neebe loron-loron hanorin atu ita boot sira bele sai di’ak, tanba liu husi edukasaun mak transforma ema sai ema,” nia tenik.
Iha fatin hanesan, Diretor Eskola ESTV-IT 28 Novembru Bekora,Tomas Pinto husu deskupa ba aktu neebe estudante ESTV- EEC) halo hamutuk ho ninia manorin nain sira, tanba nuudar hamanu liu husi dezafiu neebe hasoru no sei la ses husi sala.
“Hau reprezentante estudante estudante ESTV- EEC), hau husu deskupa tanba la konsege kontrola imi ho diak no akontese ona istori malu no tuda malu, maibe ba oin ita hamutuk atu dezenvolve nee lao ba futuru neebe mak naroman no ba ita nia nasaun,” nia deklara.
Nia informa, estudante sira mai eskola atu aprende laos atu sai inimigu, tanba estudante sira nia futuru sei naruk, entaun buka aprende laos buka inimigu iha eskola.
“Mediasaun ohin loron atu hanorin ita, atu eskola rua nee sai diak liu tan, depende ami profesor, tanba manorin neebe diak sei lori estudante sai diak, manorin nain neebe hanorin la diak sei lori estudante ba dalan neebe la diak,” nia nia esplika.
Nunee mos Komandate Eskuadra Kristu Rey, Inspetor Asistente Paulino de Cravaliho dehan, estudante sira neebe iha Sesta feira nee evolve ba kazu tuda malu, tenke hotu-hotu tuir mediasaun no halo ezame konsiensia ida ba sira nia hahalok neebe sira halo ona.
“Imi husu rasik ita boot sira nian aan, tanba saida mak tenke akontese problema, tanba manorin nain ida nunka mais hatete katak ita boot sira ba halo problema, ita nia inan-aman sira hotu nunka mais haruka nia oan sira ba halo problema, problema neebe ita boot sira halo nee ita mak kria rasik,” nia afirma.
(jen)
